მოჭიდავე ზურაბ დათუნაშვილი აცხადებს, რომ ჭიადობის ფედერაცია კარიერის დასრულებას აიძულებს. მისი თქმით, პრეზიდიუმის სხდომის შემდეგ ფედერაციისგან მიიღო პასუხი, რომ სხვა ქვეყნის სახელით ასპარეზობის უფლება არ მიეცემა.

"ამის თვითნებურად გაკეთების შემთხვევაში კი დავისჯები ორწლიანი დისკვალიფიკაციით და ამ ხნის განმავლობაში ჭიდაობის უფლება აღარ მომეცემა. მოჭიდავის სპორტული კარიერისთვის ორი წელი არის საკმაოდ დიდი პერიოდი და ამ ხნის გაცდენის შემდეგ პროფესიონალურ სპორტში დაბრუნება, ფაქტობრივად, შეუძლებელია", — განაცხადა ზურაბ დათუნაშვილმა.

ის ამბობს, რომ მისთვის ჭიდაობა არა მხოლოდ პროფესია, არამედ ცხოვრების განუყოფელი ნაწილი.

"თითქმის 22 წელია ამ სპორტში ვარ და მის გარეშე ცხოვრება ვერც წარმომიდგენია, თუმცა ახლა, 27 წლის ასაკში, დავდექი ამ მოცემულობის წინაშე — იძულებული გამხადეს კარიერის დასრულებაზე ვიფიქრო", — წერს დათუნაშვილი.

მისივე განცხადებით, არ სურს კარიერის გასრულება 27 წლის ასაკში და გეგმავს, რომ პრობლემის შესახებ აცნობოს ჭიდაობის მსოფლიო გაერთიანებასა და საერთაშორისო ოლიმპიურ კომიტეტს.

"მე მათ უნდა მივაწოდო იმის არგუმენტები, რომ ხდება ჩემი მიზანმიმართული დაჩაგვრა, რათა ჩემ მიმართ არ გამოიყენონ ზემოთ ნახსენები სანქცია. ამასთან, იძულებული ვარ უახლოეს პერიოდში ქვეყნიდანაც წავიდე. თუმცა ეს არ ნიშნავს, რომ ბრძოლა შევწყვიტე. ჩემთვის ყველაზე მნიშვნელოვანი ჩემი სიმართლეა და სადაც არ უნდა ვიყო და რასაც არ უნდა ვაკეთებდე, ყოველთვის გავაგრძელებ ფედერაციის დღევანდელ ხელმძღვანელებასთან ბრძოლას, რომელმაც შექმნა არაჯანსაღი კონკურენტული გარემო და ფედერაცია აქცია კორუფციისა და ნეპოტიზმის ბუდედ", — წერს დათუნაშვილი.

მოჭიდავე ზურაბ დათუნაშვილი გეგა გეგეშიძეს ძალადობაში ადანაშაულებს და მის გადადგომას ითხოვს. თებერვლის დასაწყისში სპორტსმენმა განაცხადა, რომ არჩევანის წინაშე დგას ან კარიერა დაასრულოს, ან სხვა ქვეყნის სახელით იასპარეზოს. პრეზიდიუმის სხდომის შემდეგ დათუნაშვილმა თქვა, რომ გეგა გეგეშიძესთან შერიგება ურჩიეს და მისი ფედერაციიდან წასვლის შესახებ საუბარი არ ყოფილა. ფედერაციის წარმომადგენლებმა განაცხადეს, რომ ზურაბ დათუნაშვილს ნაკრებიდან წასვლა და სხვა ქვეყნის სახელით ასპარეზობა სურს, რის უფლებასაც ვერ მისცემდნენ.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა.