სახელმწიფო უსაფრთხოების სამსახურმა დიდი ოდენობის თანხის თაღლითურად დაუფლების ბრალდებით ოთხი პირი დააკავა. როგორც უწყებამ განმარტა, დაკავებულები ორგანიზებული ჯგუფის წევრები არიან.

გამოძიების ინფორმაციით, ბრალდებულები ერთ-ერთი კომპანიის დირექტორს 2,7 მილიონი ლარის სანაცვლოდ კომპანიის ანგარიშებზე ყადაღისა და ინკასოს მოხსნას ჰპირდებოდნენ. უწყების განცხადებით, დაკავებულები არწმუნებდნენ დირექტორს, რომ ინფრასტრუქტურის სამინისტროში გავლენების გამოყენებით რამდენიმემილიონიან ინფრასტრუქტურულ პროექტს ტენდერისა და კონკურენციის გარეშე გადასცემდნენ.

როგორც სუს-ში ამბობენ, ბრალდებულები თაღლითურად დაეუფლნენ მოთხოვნილი თანხიდან 10 ათას დოლარს, რა დროსაც ისინი დააკავეს.

გარდა ამისა, უწყებაში განმარტავენ, რომ დაკავებულებმა 2016 წლის საპარლამენტო და 2018 წლის საპრეზიდენტო არჩევნების დროს ამავე კომპანიის წარმომადგენელს ვითომდა არჩევნების დასაფინანსებლად და სუს-ის მაღალჩინოსნებსთვის გადასაცემად ჯამში 350 ლარი გამოართვეს.

გამოძიება ორგანიზებული ჯგუფის მიერ განსაკუთრებით დიდი ოდენობით თანხის თაღლითურად დაუფლების საქმეზე მიმდინარეობს, სისხლის სამართლის კოდექსის 180-ე მუხლის მეორე ნაწილის "ა" და მესამე ნაწილის "ბ" ქვეპუნქტებით. აღნიშნული ბრალი 6-დან 9 წლამდე თავისუფლების აღკვეთას ითვალისწინებს.