უკრაინამ საქართველოს ოკუპირებული ტერიტორიების დე ფაქტო ხელისუფლების წარმომადგენლებს სანქციები დაუწესა. პრეზიდენტის ვებგვერდზე გამოქვეყნებული განკარგულების თანახმად მათ 3 წლითს აეკრძალათ უკრაინის ტერიტორიაზე შესვლა და შეეზღუდათ საკუთრებით სარგებლობის უფლება.

დე ფაქტო ჩინოვნიკების დახასიათებაში წერია, რომ ისინი იყვნენ დამკვირვებლები ე.წ. არჩევნებზე, რომელიც დონეცკისა და ლუგანსკის რეგიონებში ჩატარდა. სიაში მოხვდნენ ოკუპირებული ცხინვალის რეგიონის დე ფაქტო პარლამენტის დეპუტატები ბახვა თადეევი, იგორ ჩიჩოევი და თავმჯდომარის მოადგილე რუსლან თადეევი. ასევე, დე ფაქტო პრეზიდენტის მრჩეველი დავიდ გაზაევი და ამავე ადმინისტრაციის ხელმძღვანელი იგორ კოზაევი.

აფხაზი ჩინოვნიკებიდან სიაში მოხვდნენ, დე ფაქტო საგარეო საქმეთა სამინისტროს საგანგებო ელჩი ოლეგ არშბა. დე ფაქტო ცენტრალური აღმასრულებელი კომიტეტის წარმომადგენელი თამაზ გოგია და დეპუტატი ალმაშხან არძინბა.

ლუგანსკისა და დონეცკის რეგიონებში ე.წ. არჩევნებში მონაწილეობისთვის სანქციები დაუწესდა 43 ადამიანს. მათ შორის ბელგიის პარლამენტის დეპუტატ პენრის იანს და რამდენიმე უცხოელ ჟურნალისტს.