მთაწმინდის საარჩევნო ოლქში არჩევნები 19 მაისს გაიმართება. გადაწყვეტილება ცენტრალური საარჩევნო კომისიის წევრებმა 20 მარტს გამართულ სხდომაზე მიიღეს.

ხმის მიცემის პროცესი მთაწმინდის ოლქში 31 საარჩევნო უბანზე წარიმართება, სადაც, საერთო ჯამში, 43 868 ამომრჩეველია რეგისტრირებული.

ცენტრალური საარჩევნო კომისიის ინფორმაციით, მარნეულის, ზესტაფონის, ჭიათურის, ზუგდიდისა და ხულოს მერის არჩევნებიც 19 მაისს გაიმართება. გარდა ამისა, 8 მუნიციპალიტეტში საკრებულოს შუალედური არჩევნებიც უნდა ჩატარდეს.

მთაწმინდის მაჟორიტარი დეპუტატი მეცხრე მოწვევის პარლამენტში სალომე ზურაბიშვილი იყო. საპრეზიდენტო არჩევნებში გამარჯვების შემდეგ სალომე ზურაბიშვილს დეპუტატის უფლებამოსილება შეუწყდა და მთაწმინდის ოქლში შუალედური არჩევნები დაინიშნა.

საქართველოში შერეული საარჩევნო სისტემა მოქმედებს. პარლამენტის 150 დეპუტატიდან 77 პროპორციული წესით აირჩევა. პოლიტიკურმა პარტიამ ან ბლოკმა არჩევნებში 5 პროცენტიანი ბარიერი უნდა გადალახოს.

დანარჩენი 73 დეპუტატი მაჟორიტარული წესით ირჩევა. კონკრეტულ ოლქში წარმოდგენილი კანდიდატი გამარჯვებულად ჩაითვლება, თუ ის ხმების საერთო რაოდენობის 50 პროცენტზე მეტს მოაგროვებს. წინააღმდეგ შემთხვევაში, არჩევნების მეორე ტური დაინიშნება.