ბათუმის მაცხოვრებლები ფეისბუქზე წერენ, რომ ქუჩებიდან მიუსაფარი ცხოველები აჰყავთ, კლავენ, შემდეგ კი ე.წ. ბეიკერის ნაგავსაყრელის ორმოში ყრიან. ფეისბუქით გავრცელდა ნაგავსაყრელის ფოტოები, სადაც ორმოში ცხოველები არიან მოთავსებული.

ერთ-ერთმა მომხმარებელმა სოფიო სიხარულიძემ დაპოსტა, რომ ბათუმის ბულვარიდან ბევრი მიუსაფარი ცხოველი აჰყავთ. როგორც მან On.ge-ს უთხრა ნაგავსაყრელის ფოტოები ერთმა ქალმა გაავრცელა, რომელიც ვინაობას არ ასაჯაროებს, რადგან ამბობს, რომ ემუქრებიან. თვითონ ეს ქალი კი ყვება, რომ რამდენიმე დღის წინ სახლის კატა დაკარგა.

ბათუმში მიუსაფარი ცხოველების ვაქცინაციასა და სტერილიზაციას კომპანია სევერი კურირებს. On.ge-სთან საუბრისას კომპანიის ხელმძღვანელმა, ჯემალ გოგიტიძემ აღნიშნულ ინფორმაციას პროვოკაცია და ტყუილი უწოდა.

როგორც ის ამბობს, ქალაქში მათი მანქანა ყოველდღიურად მუშაობს, მათ შორის ბათუმის ბულვარში, რადგან ეს რეკრეაციული ზონაა. ის ადასტურებს, რომ ცხოველებს აძინებენ, თუმცა მხოლოდ მათ, რომელიც დაავადებულია.

რაც შეეხება დაკარგულ კატასა და მუქარას, გოგიტიძემ თქვა, რომ ქალს არავინ ემუქრება. მისივე თქმით, დაკარგული კატის გამო ამ ადამიანთან ადრეც ჰქონდათ კონფლიქტი და ეს საქმე პოლიციამაც გამოიძია.

"დღეს და გუშინ მოსული იყო [ქალი]. ვუთხარით, დაათვალიერეთ თუ არის ცხოველი წაიყვანეთ. ვერ ნახა ქალბატონმა თავისი კატა. წავიდა ე.წ. ბეიკერის ორმოსთან, ორი ბოქლომი მოტეხა, გახსნა ორმო და გადაიღო ფოტოები", — აღნიშნა გოგიტიძემ.

აღნიშნულ საკითხთან დაკავშირებით On.ge შინაგან საქმეთა სამინისტროს დაუკავშირდა. უწყებაში გვითხრეს, რომ საქმეს სწავლობენ.