დემურ სტურუას თვითმკვლელობამდე მიყვანაში ბრალდებული გოდერძი თევზაძე, პროკურატურას ჩაბარდა. აღნიშნულ ფაქტს ადასტურებს მთავარი პროკურატურა.

პრესსამსახურის ცნობით, ბრალდებული პოლიციელი უკვე დაკავებულია. დამატებითი დეტალების შესახებ უწყებაში არ საუბრობენ.

გოდერძი თევზაძე დასავლეთ საქართველოს საოლქო პროკურატურაში ადვოკატთან ერთად მივიდა. იგი დანაშაულს არ აღიარებს და თავს უდანაშაულოდ მიიჩნევს.

29 აგვისტოს, მთავარმა პროკურატურამ დემურ სტურუას თვითმკვლელობის საქმეზე პოლიციის თანამშრომელს გოდერძი თევზაძეს ბრალი წაუყენა. საქმეზე გამოძიება მიმდინარეობს სისხლის სამართლის კოდექსის 115-ე და 333-ე მუხლის მე-3 ნაწილით, რაც სასჯელის სახედ ითვალისწინებს 5-დან 8 წლამდე თავისუფლების აღკვეთას. ბრალდება გულისხმობს სამსახურებრივი უფლებამოსილების ბოროტად გამოყენებას ძალადობით, ან იარაღის გამოყენებით.

საგამოძიებო ორგანოს ინფორმაციით, 2016 წლის 7 აგვისტოს, უბნის ინსპექტორ-გამომძიებელმა გოდერძი თევზაძემ სამტრედიის რაიონულ სამმართველოში ყოველგვარი სამართლებრივი საფუძვლის გარეშე დაიბარა დემურ სტურუა, რომელთანაც მანამდე ჰქონდა სამსახურებრივი ურთიერთობა. მისი დაშინებისა და ზემოქმედების მოხდენის მიზნით, თევზაძემ სტურუა უკანონოდ ჩაისვა სამსახურებრივ ავტომანქანაში, წაიყვანა სოფელ იანეთის მიმართულებით, ნაკლებად დასახლებულ ადგილას, სადაც დემურ სტურუას დაემუქრა დანაშაულის დაბრალებით, მიაყენა ფიზიკური შეურაცხყოფა და სთხოვდა, პოლიციასთან თანამშრომლობას.

პროკურატურის ცნობით, გოდერძი თევზაძის მუქარამ გამოიწვია დემურ სტურუას შიში, რომ თუ მოთხოვნილ ინფორმაციას არ მიაწვდიდა, პოლიციელი შეასრულებდა მუქარას. აღნიშნულის შედეგად დემურ სტურუამ მიიღო თვითმკვლელობის გადაწყვეტილება. მან სიკვდილის წინ წერილი დაწერა, სადაც დეტალურად აღწერს, თუ როგორ ახდენდა პოლიციელი მასზე ზეწოლას.

დემურ სტურუამ, მიმდინარე წლის აგვისტოში თავი მოიკლა. თვითმკვლელობამდე დაწერილ წერილში ის დეტალურად აღწერს, თუ როგორ ძალადობდა მასზე ფსიქოლოგიურად და ფიზიკურად პოლიციელი გოდერძი თევზაძე, რადგან მისგან თანამშრომლობას ითხოვდა.