საქართველოს ყოფილმა პრეზიდენტმა მიხეილ სააკაშვილმა განაცხადა, რომ ერთიან ნაციონალ მოძრაობას თავმჯდომარეს სჭირდება. ამის შესახებ მან ვიდეომიმართვაში ისაუბრა. მისივე თქმით, ის ამ თანამდებობაზე ყოფილ საპრეზიდენტო კანდიდატს, გრიგოლ ვაშაძეს დაუჭერს მხარს.

"ივანიშვილმა გააკეთა ყველაფერი, მე არ მიშვებს ქვეყანაში, ზოგიერთი ჩვენი ლიდერი არის ციხეში, სულ ახლახან დავით კირკიტაძე დააპატიმრეს და ეს რა თქმა უნდა, ართულებს ორგანიზაციის მუშაობას, მაგრამ იმისთვის, რომ ეს გადაილახოს, ჩვენ უნდა ვიყოთ მუდმივად მოქნილები და ვაკეთოთ ისეთი რამე, რაც არ შეაჩერებს არც ერთი დღით ჩვენს ბრძოლას. ამიტომ ამ სიტუაციაში ჩემი აზრით, მნიშვნელოვანია ნაციონალური მოძრაობის თავმჯდომარის არჩევა. იმიტომ, რომ ნაციონალურ მოძრაობას სჭირდება ადგილზე ლიდერი, რომელიც ამ დროშას აიტაცებს თქვენთან ერთად", — განაცხადა მიხეილ სააკაშვილმა ვიდეო მიმართვაში.

როგორც პარტიაში On.ge-ს განუმარტეს, მიხეილ სააკაშვილი ახლა პარტიის საპატიო თავმჯდომარეა, რადგან ქვეყნის მოქალაქე არაა. ამჟამად პარტიის პოლიტიკური საბჭოს თავმჯდომარე ნიკა მელიაა.