ევროკავშირის სადამკვირვებლო მისიის ხელმძღვანელის, ერიკ ჰოგის ინფორმაციით, ხურვალეთში საოკუპაციო ხაზის გავლების ახალი ნიშნები არ არის. ამის შესახებ ის Twitter-ში წერს.

"ევროკავშირის სადამკვირვებლო მისიის ჯგუფები პატრულირებენ დიდ ხურვალეთში. "ბორდერიზაციის" ახალი ნიშნები არ შეინიშნება. უსაფრთხოების წარმომადგენლები ადგილზე არიან, თუმცა ჩვენ ინციდენტი არ დაგვიფიქსირებია. ყველა მექანიზმი, მათ შორის ცხელი ხაზიც ფუნქციონირებს ეფექტიანი კომუნიკაციისთვის", — წერს მისიის ხელმძღვანელი.

ანტისაოკუპაციო მოძრაობის წარმომადგენლის, დავით ქაცარავას ინფორმაციით, გორის მუნიციპალიტეტის სოფელ ხურვალეთში, საქართველოს კონტროლირებად ტერიტორიაზე რუსი სამხედროები შევიდნენ. სახელმწიფო უსაფრთხოების სამსახურში ამბობენ, რომ ამ ეტაპზე არ დასტურდება, რომ ოკუპანტები საქართველოს კონტროლირებად ტერიტორიაზე არიან.