სახელმწიფო უსაფრთხოების სამსახური ამ ეტაპზე არ ადასტურებს, დაახლოებით, ერთი საათის წინ გავრცელებულ ინფორმაციას, რომ საოკუპაციო რეჟიმის წარმომადგენლები საქართველოს მიერ კონტროლირებად ტერიტორიაზე იმყოფებიან:

"კონკრეტული პირების მიერ გავრცელებული ინფორმაციის გადამოწმება ცხელი ხაზის მეშვეობით მიმდინარეობს, ინფორმირებულია ევროკავშირის სადამკვირვებლო მისია და ყველა საერთაშორისო პარტნიორი".

დღეს, 15 მარტს ანტისაოკუპაციო მოძრაობის წარმომადგენელმა, დავით ქაცარავამ განაცხადა, რომ გორის მუნიციპალიტეტის სოფელ ხურვალეთში, საქართველოს კონტროლირებად ტერიტორიაზე რუსი სამხედროები შევიდნენ. ქაცარავა ამბობს, რომ ტერიტორიაზე ქართველი სამართალდამცველები არიან მობილიზებულები.

ერთ-ერთი ადგილობრივი, ლუდა სალია ამბობს, რომ ადგილზე ცუდი ვითარებაა. მისი ინფორმაციით, რუსმა სამხედროებმა სოფლის ბოლო დაიკავეს და მოსახლეობის ბაღებში არიან შესულები.