თუ კულინარიული გადაცემები გიყვართ, აუცილებლად გეცოდინებათ ყველაზე აზარტული, საინტერესო და არაპროგნოზირებადი შოუ მასტერშეფი, რომელსაც მსოფლიოს 40-ზე მეტ ქვეყანაში უყურებენ.

მაისიდან კი ამ ქვეყნების რიცხვს საქართველოც შეუერთდება. ქართველი მზარეულები ქვეყნის მთავარი შეფის ტიტულისთვის პირველი არხის ეთერში იბრძოლებენ.

გადაცემა პირველად 1990 წელს BBC-ზე გავიდა, 2005 წელს კი ფორმატი შეიცვალა და ის სახე მიიღო, რომლითაც ამჟამად ვიცნობთ. რამდენიმე სეზონის განმავლობაში ამერიკული ვერსიის ერთ-ერთი წამყვანი ცნობილი მზარეული და შეუბრალებელი კრიტიკოსი გორდონ რემზი იყო. მისი ფრაზები მალევე აიტაცა ინტერნეტმა, მისი შეფასება კი ყველა დამწყები კულინარისთვის სიკვდილ-სიცოცხლის საკითხად იქცა.

მასტერშეფში მთელი დრამა ერთ დიდ სამზარეულოში ვითარდება. მონაწილეებმა სტრესის ქვეშ უნდა შეძლონ შედევრების შექმნა, წარუმატებლობის შემთხვევაში კი, წინსაფარი მოიხსნან და კონკურსს გამოეთიშონ. აქ ხახვის ნელა ან მსხვილად დაჭრაც შეიძლება საბედისწერო შეცდომად იქცეს. მზარეულები სხვადასხვა ტიპის შეჯიბრში გამოიცდებიან, სანამ ჟიურის წევრები მათგან საუკეთესოს არ გამოავლენენ.

ქართული ვერსიისთვის მონაწილეების შერჩევა ამჟამად მიმდინარეობს. ხოლო ვინ იქნება ადგილობრივი გორდონ რემზი, ამას, ალბათ, მაისში შევიტყობთ.