ევროკომისარმა იოჰანეს ჰანმა დღეს, 5 მარტს ბრიუსელში საქართველო-ევროკავშირის ასოცირების საბჭოს სხდომის შემდეგ თქვა, რომ ვიზალიბერალიზაციის პროცესში რისკებს ვერ ხედავს, თუ ხელისუფლებისა და საზოგადოების მხრიდან ხარვეზები გამოსწორდება. ამის შესახებ მან ერთობლივი ბრიფინგის დროს, ტელეკომპანია იმედის ჟურნალისტის კითხვის პასუხად განაცხადა. ევროკომისარმა ხაზგასმით აღნიშნა, რომ საქართველოს მოქალაქეები ვერ მოიპოვებენ თავშესაფარს ევროპაში, რადგან საქართველო უსაფრთხო ქვეყნად მიიჩნევა:

"ევროკავშირში თავშესაფრის ძიება შედეგს არ მოიტანს, რადგან საქართველო მიიჩნევა უსაფრთხო ქვეყნად და ჩვენ საქართველოს ზუსტად ამ პრიზმაში ვუყურებთ. ვიზალიბერალიზაციის ფარგლებში 600 000 ადამიანი შემოვიდა ჩვენს ტერიტორიაზე და მხოლოდ რამდენიმე ათასი აკეთებს განაცხადს თავშესაფარზე. ეს მასშტაბი უკვე თავისთავად გვაწვდის ინფორმაციას".

იოჰანეს ჰანმა განაცხადა, რომ მათ სურთ "კეთილდღეობის მთელი სარტყელი" არსებობდეს ევროპაში და ცდილობენ, რაც შეიძლება მეტი მეზობელი ჩაერთოს ამ პროცესში:

"გააჩნია ინტერესებს, შესაძლებლობებს, რა თქმა უნდა. საქართველომ განაცხადა, რომ მას აინტერესებს ევროკავშირში ასეთი მონაწილეობა და ღრმა და ყოვლისმომცველი თავისუფალი ვაჭრობის სივრცე იძლევა იმის საშუალებას რომ ეკონომიკური განვითარება, უკეთესი საცხოვრებელი პირობები მოკლე და საშუალოვადიან პერიოდში იყოს თვალსაჩინო და ხელშესახები. აი ეს წყვეტა შეიძლება ძალიან მალე ამოივსოს და ეს იქნება მომდევნო ნაბიჯები. ასე ვხედავთ მომავალს".