იმერეთის რეგიონის მედიის წარმომადგენლებთან შეხვედრისას საქართველოს ყოფილმა პრემიერმინისტრმა, ბიძინა ივანიშვილმა უბლოკო სტატუსთან დაკავშირებით ნინო ბურჯანაძის ინიციატივაზე ისაუბრა. მისი თქმით, რუსეთთან ურთიერთობაში ბურჯანაძე გამორჩეული სულაც არ არის:

"უბლოკო სტატუსი მე მგონია, რომ ცოტა ბლეფია. ჩვენ გვაქვს ჩვენი სტრატეგიული მიმართულება არჩეული. რაზეც არა მარტო ქართული ოცნება, არამედ მთელი ქართული საზოგადოებაა, ჩემი აზრით, შეთანხმებული, რომ ჩვენი მიმართულება კონკურენციის გარეშე გახლავთ ევროპა, ევროკავშირი, ევროატლანტიკური სივრცე. უსაფრთხოების მხრივ კი ნატოს არ ჰყავს კონკურენტი. მე არ მგონია, რომ ქალბატონ ნინოს დიდი შანსები აქვს. რუსეთთან რომ ურთიერთობის დალაგება გვინდა, ამას ჩვენც ვამბობთ, მაგრამ არა დაკარგული ტერიტორიების ხარჯზე, რაც წყალგამყოფი შეიძლება გახდეს. ყველაფერი უნდა გავაკეთოთ იმისთვის, რომ ჩვენ მშვიდობიანად ჩვენს ყველაზე დიდ მეზობელთან დავალაგოთ ურთიერთობები და ამაში ნინო ბურჯანაძე ვერ არის გამორჩეული."

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.