Beverly Hills, 90210-ისა და Riverdale-ის მსახიობი ლუკ პერი 52 წლის ასაკში გარდაიცვალა. ის ლოს-ანჯელესის საავადმყოფოში ერთი კვირის წინ ინსულტის შემდეგ გადაიყვანეს.

"ლუკის გარშემო იყვნენ მისი შვილები, ჯეკი და სოფი, ყოფილი ცოლი მინი შარპი და საცოლე ვენდი მედისონ ბაუერი. ასევე მშობლები, და-ძმა და მეგობრები. ოჯახი მადლიერია იმ თანაგრძნობისთვის, რომელიც ბოლო დღეების განმავლობაში მიიღო. ისინი ამ მძიმე მომენტში პატივისცემას ითხოვენ. ამ მომენტში დამატებითი ინფორმაცია არ გავრცელდება", - განუცხადა მსახიობის წარმომადგენელმა The Hollywood Reporter-ს.

ამერიკული მედიის ცნობით, სასწრაფო დახმარება ერთი კვირის წინ პერის სახლში გამოიძახეს. ის ლოს-ანჯელესში რივერდეილის მესამე სეზონის გადაღებებზე იმყოფებოდა.

52 წლის პერი ცნობილი იყო დილან მაკკეის როლით თინეიჯერულ ამერიკულ სერიალშიბევერლი ჰილზი, 90210 და ასევე ნეტფლიქსის სერიალით, რივერდეილი, რომელშიც არჩის მამის, ფრედ ენდრიუსის როლს ასრულებდა.

ფოტო: Shutterstock

ცოტა ხნით ადრე, ვიდრე პერის ინსულტი მოუვიდოდა, ცნობილი გახდა, რომ ბევერლი ჰილზი, 90210-ის გაგრძელება იგეგმებოდა. დამტკიცებული მსახიობების სიაში არ იყო პერი, თუმცა იყვნენ მისი პარტნიორი მსახიობები ჯეისონ პრისლი, ჯერი გარტი, ბრაიან ოსტინ გრინი, ტორი სპელინგი და იან ზერინგი.