ბრალდებული ჯემალ სირაძე, რომელსაც გამოძიება დიდი ოდენობით ნარკოტიკული ნივთიერების შეძენა-შენახვას ედავებოდა, თავად კი პოლიციას ე.წ. ჩადებაში ადანაშაულებდა, სასამართლომ გაამართლა. მისი ადვოკატის, გიორგი მახარაძის ინფორმაციით, დაცვის მხარემ წარადგინა მტკიცებულებები, რომლითაც ბრალდებულის ჩხრეკის ოქმის არაავთენტურობა დამტკიცდა.

მახარაძე ამბობს, რომ ოქმში ჩხრეკის დროდ 32 წუთი იყო მითითებული. მისი თქმით, გამოითხოვეს ვიდომასალა უზენაესი სასამართლოსა და მთავრობის ადმინისტრაციის შენობებზე დამარგებული კამერებიდან, რომელშიც ჩანდა, რომ ბრალდებულის ჩხრეკა სულ რამდენიმე წამი გაგრძელდა. მისივე თქმით, კადრებში ჩანდა, რომ სირაძე ტაქსიდან გადმოიყვანეს და სხვა მანქანაში მალევე ჩასვეს.

სირაძის საქმეზე გამოძიება სისხლის სამართლის კოდექსის 260-ე მუხლის მე-6 ნაწილის "ა" ქვეპუქტით მიმდინარეობდა, რაც განსაკუთრებით დიდი ოდენობის ნარკოტიკული ნივთიერების შეძენა-შენახვას გულისხმობს. დანაშაული 8-დან 20 წლამდე პატიმრობას ითვალისწინებს.