გუშინ, 2 თებერვალს ბათუმის რესპუბლიკური საავადმყოფოს ეზოში ფიზიკური დაპირისპირება მოხდა, რა დროსაც ქალი და კაცი დაჭრეს. შინაგან საქმეთა სამინისტროს ინფორმაციით, დააკავეს ინციდენტში მონაწილე 5 პირი.

გაზეთ ბათუმელებთან ინტერვიუში, რესპუბლიკური საავადმყოფოს დირექტორი აცხადებს, რომ მათ ორ დაჭრილ პაციენტს ოპერაცია ჩაუტარეს, 4 პირი კი მსუბუქი დაზიანებებით სხვა კლინიკებში გადაანაწილეს. მისი თქმით, ერთი დაჭრილის მდგომარეობა მძიმე იყო, თუმცა ახლა არცერთის სიცოცხლეს საფრთხე არ ემუქრება. მისივე თქმით, დაპირისპირება კლინიკაში მყოფი ერთ-ერთი პაციენტის მნახველებს შორის დაიწყო.

როგორც On.ge-ს შსს-ში განუცხადეს, საქმეზე გამოძიება სისხლის სამართლის კოდექსის 117-ე 236-ე და 239-ე მუხლებით მიმდინარეობს, რაც ჯანმრთელობის განზრახ მძიმე დაზიანებას, ცეცხლსასროლი იარაღის მართლსაწინააღმდეგო შეძენა-შენახვას და იარაღით ჩადენილ ხულიგნობას გულისხმობს.