Facebook-გვერდებს, რომლებიც მამუკა ხაზარაძის დისკრედიტაციას ეწევა, სამთავრობო ტროლი, Avtandil Kereselidze მართავს. ამის შესახებ მედიის განვითარების ფონდის (MDF) კვლევაშია აღნიშნული. ფონდმა მონიტორინგი სოციალურ ქსელებში თიბისი ბანკის წინააღმდეგ დაწყებული კამპანიისა და ამ კამპანიის წყაროების იდენტიფიცირების მიზნით ჩაატარა.

კვლევის მიხედვით, ტროლი ოთხ გვერდს: იყავი და გაგეკეთებინა, პოლიტიკური სანაგვე, ჩვენთვის არავინაა, მოვკვდები საქართველოსთვის მართავს. ფონდმა დაადგინა, რომ რეალურად ეს ადამიანი არ არსებობს და ფოტოები მომხმარებელ Karo Manukyan-ს ეკუთვნის, რომელიც ერევანში ცხოვრობს.

"კლასიკური ტროლისგან განსხვავებით ავთანდილ კერესელიძის პროფილი არაერთ პირად ფოტოს მოიცავს, რაც ქმნის განცდას, რომ ის რეალური პიროვნებაა. მისი თაიმლაინიდან ჩანს აქტივობები და მისი პირადი ინტერესები, როგორიცაა, მაგალითად, ე.წ. ჩექინები გერმანიაში, პოსტები შთაბეჭდილებების შესახებ", — წერია კვლევაში.

ფოტო: MDF

ფოტო: MDF

ერთ-ერთ ფოტოზე, რომელიც კერესელიძეს პირად ფოტოებში აქვს ატვირთული, ჩანს წარწერა Schüco. ამ სახელწოდების გერმალური კომპანია ფანჯრებსა და კარებს ამზადებს. კვლევაში წერია, რომ კერესელიძის მიერ ატვირთული სხვა ფოტოების yandex.people-ში გადამოწმებით, საძიებო სისტემამ იდენტური ფოტოები სხვადასხვა რუსულ გაცნობით პლატფორმებზე იპოვნა.

"ამის შემდეგ Karo Manukyan-ის პროფილი ფეისბუკში მოვიძიეთ. აღმოჩნდა, რომ ფოტოები, რომლებსაც ტროლი ავთანდილ კერესელიძე თავისად ასაღებდა, კარო მანუკიანს ეკუთვნის. მის შესახებ განყოფილებაში კი კარო მანუკიანს მითითებული აქვს, რომ გერმანულ კომპანიაში Schüco ტექნიკურ კონსულტანტად და სპეციალისტად მუშაობს", — აღნიშნულია კვლევაში.

ფოტო 2: MDF

კვლევაში წერია, რომ ავთანდილ კერესელიძის ყალბი პროფილით სოციალურ ქსელებში პროსახელისუფლებო გზავნილები და ერთიანი ნაციონალური მოძრაობის მადისკრედიტირებელი პოსტები ქვეყნდება.

ფოტო: MDF

"გზავნილების გასავრცელებლად ის მისივე მართულ სპამ ჯგუფებს იყენებს, ასევე კომენტარებს ტოვებს იმ გვერდების პოსტების ქვეშ, რომელთა ადმინისტრატორი თავადვეა", — წერია კვლევაში.

ფოტო: MDF

ფოტო: MDF

განახლება: მასალის გამოქვეყნების შემდეგ Avtandil Kereselidze-ს ექაუნთით გამოქვეყნდა პოსტი, სადაც წერია, რომ ის რეალური პიროვნებაა და მის წინააღმდეგ ლიბერალურმა ორგანიზაციამ და მედიებმა შეტევა დაიწყეს.

ამავე თემაზე: