ჩეჩნეთის მეთაურის, რამზან კადიროვის 18 წლის შვილმა, ადამ კადიროვმა, ენერგეტიკული სასმელი სახელწოდებით K13 გამოუშვა. აღსანიშნავია, რომ მანამდე რამზან კადიროვი ენერგეტიკულ სასმელებს "საწამლავს" უწოდებდა.

OC-MEDIA რუსულ დამოუკიდებელი მედიასაშუალება "ვერსტკაზე" დაყრდნობით წერს, რომ 15 აპრილს რამზან კადიროვი და ჩეჩნეთის პარლამენტის თავმჯდომარე, მაგომედ დაუდოვი, გროზნოში ჰიპერმარკეტის გახსნას დაესწრნენ, სადაც ახალი სასმელი გასინჯეს.

ადამ კადიროვმა საკუთარ Instagram-ის გვერდზე სარეკლამო ვიდეოც გამოაქვეყნა, რომელშიც ჩანს BMW-ს მარკის ავტომობილი K13-ის ლოგოებით. ავტომობილის შიგნით გადაღებულ ერთ-ერთ კადრში ჩანს წარწერა DUSTUM — ეს ადამის მეტსახელია.

სასმელის ვიზუალური სტილი Monster Energy-ის პროდუქციას ჰგავს: ქილა მუქ ფერებშია გადაწყვეტილი, ხოლო K13-ის ლოგოს შრიფტი ამერიკული ბრენდის მსგავსია.

გამოცემის თანახმად, სავაჭრო ნიშნის რეგისტრაციაზე განაცხადი მარტში შეიტანა კომპანიამ United Company-იმ, რომელიც თავად ერთი თვით ადრე დარეგისტრირდა. მფლობელად მითითებულია ისლამ ვისალიევი. 9 აპრილს ვისალიევმა დაარეგისტრირა კიდევ ერთი კომპანია სახელწოდებით K-13, რომელიც პროდუქტის ოფიციალურ ვებგვერდზეა მითითებული.

წარსულში რამზან კადიროვი ენერგეტიკული სასმელების გავრცელების წინააღმდეგ გამოდიოდა. 2012 წელს მან საზოგადოებას მათი მოხმარების შეზღუდვისკენ მოუწოდა, ასეთ პროდუქტებს "დამათრობელი ნივთიერებები" უწოდა და განაცხადა, რომ მათი გამოყენება მუსლიმურ საზოგადოებაში მიუღებელია. მისი თქმით, ენერგეტიკული სასმელების მოხმარება ეწინააღმდეგება ისლამის პრინციპებს.

"და რას ვხედავთ მაღაზიის დახლებზე? ყველგან, ღიად, ლამაზად შეფუთული ქილებით ეს საწამლავი იყიდება", — თქვა მაშინ კადიროვმა.

ადამ კადიროვი მამამისის მემკვიდრეობის ერთ-ერთ მთავარ კანდიდატად განიხილება. მას უკვე უკავია რამდენიმე მნიშვნელოვანი საჯარო და სამთავრობო პოსტი: ხელმძღვანელობს მამის უსაფრთხოების სამსახურს, არის ჩეჩნეთის უშიშროების საბჭოს მდივანი, კურირებს ჩეჩნეთის შინაგან საქმეთა სამინისტროს, ასევე ზედამხედველობს რუსეთის სპეცრაზმის უნივერსიტეტს გუდერმესში და თავდაცვის სამინისტროს ბატალიონს.

იანვარში მომხდარი ავტოსაგზაო შემთხვევის შემდეგ, მისი საჯარო აქტივობა შემცირდა, რის გამოც ზოგიერთი ვარაუდობს, რომ მამას ახლა სხვა ფავორიტები ჰყავს.