სერიალების სპინოფების უმეტესი ნაწილი შოუს რამდენიმე მიმართულებით ავითარებს. შესაძლოა, სპინოფში პერსონაჟების ისტორია გაგრძელდეს, როგორც ეს Frasier-ის შემთხვევაში ხდება. მეორე მიმართულებაა, როცა უკვე ნაცნობ პერსონაჟებსა და მოვლენებს უფრო დეტალურად ვეცნობით, მაგალითად, Game of Thrones-ის სპინოფებში. კიდევ ერთი შემთხვევაა, როცა კონცეფცია უბრალოდ იმავე სამყაროს სხვა გარემოში გადადის, ამის მაგალითები კი CSI და Law & Order-ია.

ფოტო: Netflix

რამდენად წარმოუდგენლადაც არ უნდა ჟღერდეს, Stranger Things-ის ანიმაციური სერიალი არც ერთ მიმართულებას არ მიჰყვება. ნაცვლად იმისა, რომ ახალი ამბავი, წარსულის მოვლენები ან სხვა პერსონაჟები გაგვაცნოს, Stranger Things: Tales From ‘85 ზუსტად ორიგინალი სერიალის სიუჟეტს იმეორებს.

სერიალსა და ანიმაციას შორის ერთადერთი განსხვავება ისაა, რომ პერსონაჟებს სხვა მსახიობები ახმოვანებენ. თანაც, ანიმაცია არასდროს დადგება ბავშვებზე გადაღებული სერიალების იმ მთავარი დაბრკოლების წინაშე, რომელიც მსახიობების ასაკის მატებას უკავშირდება. ასე რომ, Netflix-ს საშუალება ეძლევა, ამ პროექტისგან შემოსავალი ორიგინალი სერიალის დასრულების შემდეგაც მიიღოს.

ფოტო: Netflix

როგორც სერიალის სათაურიდან ვიგებთ, სიუჟეტი მეორე და მესამე სეზონებში მომხდარ ისტორიას ზედმიწევნით მიჰყვება. კერძოდ, უილი, მაიკი, ლუკასი, დასტინი, მაქსი და ილევენი ერთად ებრძვიან Mindflayer-ის მიერ გამოწვეულ საფრთხეებს.

გარდა ამისა, ანიმაციურ სერიალში პერსონაჟები ზუსტად ისეთები არიან, როგორც ორიგინალში. დასტინი სტივთან მეგობრობს, ლუკასი და მაქსი შეყვარებულები არიან, მაიკი ილევენს იცავს და ა.შ. თუმცა, Stranger Things: Tales From ‘85-ს ერთი ახალი პერსონაჟი, ვარდისფერთმიანი გამორჩეული სტილის გოგო, სახელად ნიკი, ჰყავს.

ფოტო: Netflix

აღსანიშნავია, რომ ნიკის ინდივიდუალობას მხარს უჭერს დედამისი, საბუნებისმეტყველო საგნების მასწავლებელი. კრიტიკოსების თქმით, ნიკი რობინის მსგავს როლს ასრულებს და უილისთვის გახდება მისაბაძი ადამიანი.

კრიტიკოსების აზრით, Stranger Things-ის ანიმაციური სერიალი ერთ-ერთი ყველაზე შემზარავი და შემაშფოთებელი იდეაა, რომელიც საშინელებათა ჟანრთან დაახლოებულ ამ ფრენჩაიზს ბოლო წლებში შემოუთავაზებია.

ფოტო: Netflix

შეგახსენებთ, რომ Stranger Things: Tales From ‘85-ის ყველა ეპიზოდის ნახვას Netflix-ზე შეძლებთ.