ზოგიერთი გადაწყვეტილება წლების შემდეგ ბევრად უფრო მკაფიო მნიშვნელობას იძენს — განსაკუთრებით მაშინ, როცა უკან იყურები და ხედავ, როგორ იქცა პატარა, შესაძლოა ეჭვით სავსე ნაბიჯი დიდ შესაძლებლობად.

განათლების მხარდაჭერის ფარგლებში, საქართველოს ბანკი აგრძელებს ისტორიების გაზიარებას, რომლებიც გვაჩვენებს, თუ როგორ შეიძლება სწავლამ და მუდმივმა განვითარებამ განსაზღვროს ადამიანის გზა. ამჯერად, ინიციატივის ფარგლებში, გაეცნობით წარმატებული ადამიანების რეფლექსიებს იმის შესახებ, თუ რას ეტყოდნენ ისინი საკუთარ 19 წლის თავს — იმ პერიოდში, როცა ჯერ კიდევ ძიების პროცესში იყვნენ.

ვიდეოფორმატის მიღმა დარჩენილი პასუხები ხშირად არანაკლებ საინტერესო და ღრმაა. სწორედ ამიტომ, გთავაზობთ სრულ ინტერვიუს მარი სუხიშვილთან — კრეატიულ და არტ დირექტორთან, არტ დაირექშენის ლექტორთან და საერთაშორისო ფესტივალების ჟიურის წევრთან.

მისი პასუხები კიდევ ერთხელ უსვამს ხაზს იმ აზრს, რომ წარმატებისკენ მიმავალი გზა იშვიათად არის სწორი და წინასწარ განსაზღვრული — ეს არის პროცესი, რომელიც შედგება პატარა გამარჯვებებისგან, შეცდომებისგან და მუდმივი განვითარების სურვილისგან.

მარის ისტორია გვახსენებს, რომ ხშირად გადამწყვეტი მნიშვნელობა სწორედ იმ ნაბიჯებს ენიჭება, რომლებიც თავდაპირველად ყველაზე რთულად გასაბედია. ამიტომ, ალბათ, ყველაზე მნიშვნელოვანი რჩევაც სწორედ ეს არის — არ შეწყვიტო ძიება, არ შეგეშინდეს შეცდომების და არ გაჩერდე განვითარების გზაზე.

რა გავლენა მოახდინა სწავლამ შენს ცხოვრებაზე?

სწავლამ მომცა მყარად დგომის საფუძველი და ის ხელსაწყოები, რომლებითაც ბევრი საინტერესო სათამაშოს შექმნა შეიძლება.

19 წლის ასაკში შენი ყველაზე დიდი ოცნება?

მინდოდა რაღაც ისეთი შემექმნა, რასაც ადამიანები იგრძნობდნენ.

პირველი პატარა გამარჯვება, რომელიც გახსოვს?

ერთხელ ისეთი მათემატიკური ამოცანა ამოვხსენი, რომელსაც მთელი კორპუსი — დიდიან-პატარიანად ერთდროულად ხსნიდა და ვერავინ ამოხსნა.

ყველაზე მნიშვნელოვანი გაკვეთილი შეცდომიდან?

რომ შეცდომა ყოველთვის გაკვეთილია.

რა გაიძულებს მუდმივად ისწავლო?

მუშაობის გარდა ვასწავლი სხვებსაც და ალბათ ეგ მაიძულებს დავრჩე რელევანტური დროსთან მიმართებაში.

რას იტყოდა 19 წლის შენ, დღევანდელ შენზე?

როგორც 34 წლის მარი ვერ იჯერებს, ისე 19 წლის მარიც ვერ დაიჯერებდა რომ ტყუპების დედაა.

წარმატება რა არის დღეს შენთვის?

წარმატება ჩემთვის პროცესია, რომელიც არასდროს მთავრდება. როგორც კი მას მიღწეულ მდგომარეობად ჩათვლი, მგონია, იქვე მთავრდება ზრდაც.

რომელმა გადაწყვეტილებამ შეცვალა ყველაფერი?

როდესაც სრულიად გამოუცდელმა მარიმ გაბედა და ერთი შეხედვით მიუღწევადი სამსახური მოითხოვა.

რა არის ყველაზე დიდი ძალა ახალგაზრდობაში?

ის, რომ შეგიძლია მთელი დრო ძიებას დაუთმო და ღამეების თენებას არ ნანობ მომავალი 3 დღის განმავლობაში.

რას ეტყოდი იმ 19 წლის საკუთარ თავს, რომელსაც ჯერ კიდევ ბევრი ეჭვი აქვს?

არ მოუსმინო სხვებს, ვინც გეუბნება რომ უკვე გაიზარდე და უნდა იყო მეტად სერიოზული, არ გამოგადგება.

უფრო მეტისთვის ნახეთ ვიდეო.

სრული ინტერვიუსთვის, ეწვიეთ ბმულს.

და, გახსოვდეთ, განათლების გზაზე არ გაჩერდეთ.