ქართული ოცნების დეპუტატმა, ეკა ბესელიამ პარლამენტში გამოსვლის დროს განაცხადა, რომ მხარს უჭერს ირმა ინაშვილის რეზოლუციას, რომლითაც მესამე პრეზიდენტის, მიხეილ სააკაშვილის მმართველობას დანაშაულებრივ რეჟიმად უნდა გამოცხადდეს.

ბესელია მოსამართლეების უვადოდ დანიშვნის მორატორიუმის აუცილებლობაზე ისაუბრა. მისი თქმით, მოსამართლეების ნაწილი ე.წ. ძალადობრივი რეჟიმის მსახურები იყვნენ.

"მოსამართლე არის მსაჯული, რომელსაც მიწაზე გამოაქვს განაჩენი საქართველოს სახელით. მე მინდა ვკითხო იურიდიულ საკითხთა კომიტეტს წევრებს, ვინც მხარი არ დაუჭირა ამ ინიციატივას, თემიდას თვალები რატომ აქვს ახვეული იცით? სამართლიანობა არ არის აქსესუარი, რომელსაც მოირგებ ისე, როგორც გინდა", — აღნიშნა ბესელიამ.

დღეს, 21 თებერვალს პარლამენტის სესიაზე რაიონულ, საქალაქო და სააპელაციო ინსტანციებში მოსამართლეების უვადოდ დანიშვნის შეჩერებასთან დაკავშირებით კანონპროექტს განიხილავენ. ბესელიამ და მისმა თანამოაზრეებმა ქართული ოცნებიდან კანონპროექტი 7 თებერვალს დაარეგისტრირეს. აღნიშნულ ინიციატივას ხელს აწერენ დეპუტატები: ეკა ბესელია, გედევან ფოფხაძე, ლევან გოგიჩაიშვილი, დავით ჭიჭინაძე, ოთარ ჩრდილელი, ლევან კობერიძე, კობა ნარჩემაშვილი. ისინი ფიქრობდნენ, რომ უმრავლესობა ამ ცვლილებებს მხარს დაუჭერდა.

აღნიშნული კანონპროექტი ჩავარდა იურიდიულ საკითხთა კომიტეტში და მას მხარს არ უჭერს ქართული ოცნების პოლიტსაბჭო.

ამავე თემაზე: