Brit Awards-ზე ბიონსე და ჯეი-ზი 2019 წლის საუკეთესო საერთაშორისო ჯგუფის ჯილდოს მფლობელები გახდნენ.

დაჯილდოებაზე კარტერები არ იმყოფებოდნენ, თუმცა მათ სამადლობელი ვიდეო ინსტაგრამზე გამოაქვეყნეს, სადაც ისინი მეგან მარკლის პორტრეტის წინაშე დგანან.

"შავკანიანთა ისტორიის თვის საპატივსაცემოდ, ჩვენ ქედს ვიხრით ჩვენს საკუთარ Melanated Monas-ის წინაშე", - დაწერა ბიონსემ ინსტაგრამზე.

მეგან მარკლი ორი რასის წარმომადგენელია. მისი სახელი და გვარი ორივე "მ" ასოზე იწყება, ისევე როგორც ბიონსეს მიერ შერქმეული და მონა ლიზასთვის მიმგვანებული Melanated Monas.

სამადლობელი ვიდეო ასევე კარტერების კლიპის "Ape Shit" ასოციაციას ქმნის, რომელიც ლუვრშია გადაღებული და წყვილი მონა ლიზას პორტრეტის წინაშე დგას.

ბიონსემ მეგან მარკლის მიმართ პატივისცემა და მხარდაჭერა თავის საიტზეც გამოხატა და აღნიშნა, რომ ის თავისი კარიერით მოპოვებულ პოპულარობას სასარგებლოდ იყენებდა:

"როგორც World Wision-ის საერთაშორისო ელჩი, ის რუანდაში ჩავიდა იმის სანახავად, თუ როგორ მოქმედებს სუფთა წყლის არარსებობა ბავშვებზე. ის ეწვია და მხარდაჭერა გამოუცხადა მუმბაიში არსებულ ორგანიზაციას, რომელიც ადგილობრივ ქალებს მენსტრუალური პრობლემების გადაჭრაში ეხმარება".

"პრინც ჰარიზე ქორწინებით, ის სასექსის ჰერცოგინია გახდა და ასევე პირველი შავკანიანი ქალი, რომელიც სამეფო ოჯახს შეუერთდა. მეგანმა შავკანიანების ტრადიციები სამეფო ქორწილშიც გამოიყენა. მან საზეიმო ცერემონიაზე მიიწვია შავკანიანი მღვდელი, მგალობელთა გუნდი და ახალგაზრდა შავკანიანი ჩელისტი. მან და პრინცმა ჰარიმ რასობრივ ურთიერთობაზე დიალოგი წინ წაიყვანა".

ბიონსემ სასექსის ჰერცოგინიას ორსულობა მიულოცა და ბედნიერება უსურვა.