შინაგან საქმეთა სამინისტროს ინფორმაციით, ვერცხლის ქუჩაზე მომხდარი მკვლელობის საქმეზე განზრახ მკვლელობის მცდელობის, იარაღის უკანონო ტარების და დანაშაულის შეუტყობინებლობის ბრალდებით 5 პირი დააკავეს, გაზრახ მკვლელობის საქმეზე კი ერთს ამ დრომდე ეძებენ.

უწყების განცხადებით, 19 თებერვალს, თბილისში, ვერცხლის ქუჩაზე, ურთიერთშელაპარაკების ნიადაგზე, ერთ-ერთმა ბრალდებულმა ცეცხლსასროლი იარაღიდან გასროლით სხეულზე ჭრილობა მიაყენა 53 წლის პირს. მათი თქმით, იქვე მყოფმა პირმა საპასუხო გასროლები განახორციელა და სასიკვდილო ჭრილობები მიაყენა 43 წლის პირს, რომელიც ადგილზევე გარდაიცვალა. მათივე თქმით, კონფლიქტში მონაწილე სხვა პირები შემთხვევის ადგილიდან მიიმალნენ.

შსს-ს ინფორმაციით, ცეცხლსასროლი იარაღით დაჭრილი 53 წლის პირი ამ დრომდე ექიმების მეთვალყურეობის ქვეშ, სამკურნალო დაწესებულებაში იმყოფება. მისი ჯანმრთელობის მდგომარეობა მძიმეა.

უწყების განცხადებით, დაკავებულებს ბრალი განზრახ მკვლელობის მცდელობის, ცეცხლსასროლი იარაღის უკანონო შეძენა-შენახვა-ტარების, განსაკუთრებით მძიმე დანაშაულის დაფარვისა და შეუტყობინებლობის ბრალდებებით წარუდგინეს.