კოალიცია მედია ადვოკატირებისთვის მიუღებლად მიიჩნევს საზოგადოებრივი მაუწყებლის მიერ კერძო ტელეკომპანიებთან იმედი, მაესტრო და GDS ერთად საარჩევნო ეგზიტპოლის ჩატარების გადაწყვეტილებას. განცხადებას ამის შესახებ ჟურნალისტური ეთიკის ქარტია ავრცელებს.

განცხადების თანახმად, საქართველოს ჟურნალისტური ეთიკის ქარტიისა და საქართველოს კომუნიკაციების ეროვნული კომისიის მიერ ჩატარებული მედიამონიტორინგის შედეგები ქართული ტელეარხების მხრიდან სხვადასხვა პარტიის მიმართ სიმპათიის არსებობაზე მიუთითებს. აღნიშნულ ტელეარხებთან ერთობლივი ეგზიტპოლის ჩატარება კი საზოგადოებრივი მაუწყებლის მიმართ, არხის პოლიტიკურ დამოუკიდებლობაზე კითხვებს გააღრმავებს:

"ჩვენ ქვეყანაში ეგზიტპოლი არაერთხელ გამხდარა პოლიტიკური მანიპულაციის იარაღი. კოალიცია „მედიის ადვოკატირებისათვის“ მიიჩნევს, რომ კერძო ტელეკომპანიებთან ერთად საარჩევნო ეგზიტპოლის ჩატარება უარყოფითად აისახება საზოგადოებრივი მაუწყებლის მიმართ მაყურებლის ნდობაზე და გააღრმავებს კითხვებს მაუწყებლის პოლიტიკური დამოუკიდებლობის შესახებ.

კოალიცია თვლის, რომ საჯარო ფინანსები არ უნდა იხარჯებოდეს არხისთვის ზიანის მომტან ქმედებებზე. კოალიცია „მედიის ადვოკატირებისათვის“ მოუწოდებს საზოგადოებრივ მაუწყებელს შეცვალოს მიღებული გადაწყვეტილება და მაუწყებლის ყველა რესურსი მიმართოს მიმდინარე პროცესების სრულყოფილად, დროულად და მიუკერძოებლად გასაშუქებლად."