8 ივნისს რუსთავი 2-ის ეთერში ფორმულა კრეატივის ახალი სერიალი ხელოვნური სუნთქვა დაიწყო, რომელზეც რეჟისორი გიორგი ლიფონავა მუშაობს, სცენარისტები კი ქეთი დევდარიანი და დრამატურგი დავით გაბუნია არიან.

სერიალის გამოსვლამდე იქმნებოდა შთაბეჭდილება, რომ ახალი შოუ სამედიცინო დრამა იყო. თუმცა, საბოლოოდ აღმოჩნდა, რომ ის არ არის კლასიკური სამედიცინო დრამა. მთავარი გმირი შოთა (თორნიკე გოგრიჭიანი) სასწრაფოს ექიმია, რომელმაც საშუალებას მოგვცა, შევსულიყავით ყველანაირ ოჯახში და თითოეულ სერიაში სხვადასხვა ამბავი გაგვეგო, რომელსაც ბევრად უფრო შორს მივყავართ, ვიდრე უბრალოდ კლასიკურ სამედიცინო დრამას.

აღსანიშნავია ისიც, რომ ყველა სამედიცინო ქეისი, რომელსაც მთავარი პერსონაჟი პროფესიული საქმიანობის განხორციელების დროს ხვდება, რეალურია. ასეთი ამბების ავთენტურობას კი სერიალის კონსულტანტი, თინა გაგუა აქცევს ყურადღებას.

როგორც სერიალის სცენარისტმა ქეთი დევდარიანმა გვითხრა, შოუს მეორე სეზონი 14 სექტემბერს დაიწყება და ის იანვრის დასაწყისამდე გაგრძელდება. ანუ უკვე თამამად შეგვიძლია ვთქვათ, რომ წინ ცოცხალი, დინამიური და საინტერესო სერიალის ყურებაში გატარებული თითქმის ოთხი თვე გველის.

ქეთი დევდარიანი ამბობს, რომ მეორე სეზონში რამდენიმე ახალი პერსონაჟი გამოჩნდება, მათ შორის თორნიკე გოგრიჭიანის პერსონაჟის შოთას და და სიძე. თუმცა გამომდინარე იქიდან, რომ ახალი სეზონი საკმაოდ სპეციფიკურია, სცენარისტები სხვა დეტალებს არ ამხელენ.

ხელოვნური სუნთქვა 14 სექტემბრიდან ყოველ ოთხშაბათსა და ხუთშაბათს, 22:00 საათზე გავა რუსთავი 2-ის ეთერში. სერიალის შესახებ სიახლეების გასაგებად, თვალი ადევნეთ ოფიციალურ გვერდს ფეისბუქზე.

ასევე წაიკითხეთ: