იუსტიციის უმაღლესი საბჭოს მოსამართლე წევრების ნაწილი ეკა ბესელიასა და ქართული ოცნების რამდენი დეპუტატის მიერ მომზადებულ კანონპროექტს აკრიტიკებენ და საკუთარი პოზიციის გასამყარებლად ვენეციის კომისიის დასკვნები მოჰყავთ. ამ კანონპროექტით, დროებით უნდა შეჩერდეს მოსამართლეების გამწესება უვადოდ, პირველ და მეორე ინსტანციაზე ანუ საქალაქო და სააპელაციო სასამართლოში.

მოსამართლე სერგო მეთოფიშვილი, რომელიც ეკა ბესელიას მოსამართლეებზე მუქარაში ადანაშაულებდა, წერს, რომ კანონპროექტი ეწინააღმდეგებაკონსტიტუციას, არის დისკრიმინაციული და ანტისახელმწიფოებრივი, ასევე ეწინააღმდეგება საერთაშორისო სტანდარტებს და პრაქტიკას.

სერგო მეთოფიშვილი ყურადღებას ამახვილებს ევროპის მოსამართლეთა საკონსულტაციო საბჭოს დასკვნაზე, სადაც წერია, რომ მოსამართლეთა უვადოდ დანიშვნა სასამართლო სისტემის დამოუკიდებლობის გარანტორია. მეთოფიშვილის თქმით, ამ დასკვნაში ასევე წერია, რომ მოსამართლეთა დანიშვნა/დაწინაურება ვიწრო პოლიტიკურ ინტერესს არ უნდა ემყარებოდეს.

"ისმის კითხვა — თუ დეპუტატების ამ ჯგუფმა არ იცის საერთაშორისო და ევროპული პრაქტიკა სასამართლო სისტემის შესახებ, არ იცის საერთაშორისო ორგანიზაციების მიერ ამ თემაზე შემუშავებული რეკომენდაციები და დასკვნები, მაშინ, საერთოდ, რატომ ეხებიან სასამართლოს სისტემას? ხოლო, თუ იციან საერთაშორისო და ევროპული სტანდარტები და პრაქტიკა, მაშინ რატომ უვლიან გვერდს ამ სტანდარტებს? რატომ არიან ისინი პროგრესის წინააღმდეგ?", — წერს მეთოფიშვილი ფეისბუქზე.

ის მიმართავს ეკა ბესელიასა და კანონპროექტის ავტორ სხვა დეპუტატებს, რომ მსგავსი "ქცევა და ქმედება წარმოადგენს თავდასხმას დემოკრატიული სახელმწიფოს კონსტიტუციაზე, ანუ თავდასხმას საკუთარი ქვეყნის კონსტიტუციაზე, ხელისუფლების სხვა შტოს ლეგიტიმურობაზე".

სერგო მეთოფიშვილის აზრს იზიარებს იუსტიციის საბჭოს მოსამართლე წევრი, დიმიტრი გვრიტიშვილი. მისი თქმით, მისი და სერგო მეთოფიშვილის არათუ უფლება, არამედ ვალდებულებაა გამოთქვან საკუთარი მოსაზრებები ყველა იმ საკანონმდებლო ინიციატივაზე, რომელიც, მათი აზრით, შელახავს სასამართლოს დამოუკიდებლობას, შეაფერხებს მის ეფექტიან მუშაობას და მოსამართლეთა დანიშვნას.

"ბატონებო, ვერც თქვენ და ვერც ვერავინ დედამიწის ზურგზე გაგვაჩუმებთ და ვერც პასუხს მოგვთხოვთ ვითომდა პოლიტიკური განცხადებების გაკეთების გამო! ჩვენ ვიცავთ სასამართლო ხელისუფლების აბსოლუტურად ლეგიტიმურ ინტერესებს!", — განაცხადა მოსამართლემ.

პირველი შემთხვევა არ არის, როცა მოსამართლე მეთოფიშვილი და მოსამართლე გვრიტიშვილი ეკა ბესელიას საჯაროდ აკრიტიკებს. სერგო მეთოფიშვილმა ბესელია მოსამართლეებზე ზეწოლაშიც კი დაადანაშაულა, დიმიტრი გვრიტიშვილმა კი არ გამორიცხა, რომ პირადი ცხოვრების ამსახველი კადრების გავრცელება თავად ეკა ბესელიას ინტერესი იყო.