გაერთიანებული ოპოზიცია ძალა ერთობაშია განათლების სამინისტროს ხარჯების ოპტიმიზაციისა და სტატუსშეჩერებული სტუდენტების პრობლემის მოგვარებისკენ მოუწოდებს. ამის შესახებ გაერთიანებული ოპოზიციის წევრმა, დიმიტრი შაშკინმა ბრიფინგზე განაცხადა. მისი თქმით, დღეის მდგომარეობით საქართველოში 54 ათასი სტატუსშეჩერებული სტუდენტია.

"2011-2012 წლებში, ჩვენ გვყავდა 4 ათასი სტატუსშეჩერებული სტუდენტი. მაშინ ეს სერიოზულ პრობლემად მიგვაჩნდა და ვმუშაობდით სხვადასხვა მეთოდებით პრობლემის გადაჭრაზე. დღეს, განათლების სამინისტროს მიერ მოწოდებული ოფიციალური ინფორმაციით, საქართველოში 54 ათასი სტატუსშეჩერებული სტუდენტი გვყავს. აქედან 17 ათასი ოფიციალურად აფიქსირებს, რომ სტატუსი გადახდისუუნარობის გამო შეუჩერდა. აღსანიშნავია, რომ სტუდენტს შეუძლია როგორც დააფიქსიროს, ასევე უარი თქვას მიზეზის განმარტებაზე, თუ რის გამო უჩერდება სტატუსი", — განაცხადა დიმიტრი შაშკინმა ბრიფინგზე.

მისი თქმით, 2011-2012 წლებთან შედარებით სტატუსშეჩერებული სტუდენტების რიცხვი გაზრდილია, რაც ქვეყანაში არსებულ ეკონომიკურ პრობლემას უკავშირდება.

გაერთიანებული ოპოზიცია განათლების სამინისტროს სთავაზობს:

  1. შეწყვიტოს ფულის ხარჯვა თავის თავზე. მოახდინოს ხარჯების ოპტიმიზაცია და ფინანსები მიემართოს იმ პირებზე, რომელთაც ეს სჭირდებათ;
  2. დაიწყოს მუშაობა უნივერსიტეტებთან, რომ უმაღლეს სასწავლებელში შეიქმნას სოციალური დახმარების ფონდი;
  3. დაწესდეს შეღავათიანი სესხები, რათა სტუდენტებმა შეძლონ სესხის აღება და განათლების დაფინანსება.