აშშ-ში ვენესუელის დროებითი პრეზიდენტის წარმომადგენელმა, კარლოს ალფრედო ვეკიომ განაცხადა, რომ საქართველოს ტერიტორიულ მთლიანობას მხარს უჭერენ და სუვერენიტეტს აღიარებენ. მათი თქმით, ვენესუელაში სრული კონტროლის მოპოვების შემდეგ საქართველოსთან თანამშრომლობას აპირებენ. ინფორმაციას საგარეო საქმეთა სამინისტრო ავრცელებს.

"ჩვენ გვინდა გავხსნათ ურთიერობები საქართველოსთან. ჩვენ მათთან ერთად ვართ და მათ საქმეს მხარს ვუჭერთ. ჩვენ მხარს დავუჭერთ და ვაღიარებთ საქართველოს, როგორც ერთადერთ ქვეყანას, რომელსაც გააჩნია იურისდიქცია აღნიშნულ ტერიტორიებზე. არსებული სიტუაცია ეწინააღმდეგება საერთაშორისო სამართალს", — უწყებაში ამბობენ, რომ ეს განცხადება ალფრედო ვეკიომ ზალკალიანთან შეხვედრის შემდეგ გაავრცელა. შეხვედრა საქართველოს საგარეო საქმეთა მინისტრის დავით ზალკალიანის ვაშინგტონში ვიზიტის ფარგლებში გაიმართა.

ვენესუელის ეროვნული ასამბლეის თავმჯდომარემ, ხუან გუაიდომ ქვეყნის დროებით პრეზიდენტად თავი 24 იანვარს გამოაცხადა. მისი თქმით, ის დაასრულებს ქვეყანაში ნიკოლას მადუროს დიქტატორულ რეჟიმს, ჩამოაყალიბებს გარდამავალ მთავრობას და სამართლიან საპრეზიდენტო არჩევნებს ჩაატარებს.

სატელევიზიო ინტერვიუში ვენესუელის ჯერ კიდევ მოქმედმა პრეზიდენტმა, ნიკოლას მადურომ თქვა, რომ ქვეყანაში სამოქალაქო ომის დაწყებას არ გამორიცხავს. აშშ-ს პრეზიდენტმა დონალდ ტრამპმა CBS-სთან ისევ აღნიშნა, რომ კრიზისის დასაძლევად სამხედრო ჩარევა ისევ ვარიანტად რჩება. მადურომ გააფრთხილა ტრამპი, რომ ჩარევის შემთხვევაში ვიეტნამის ომის სცენარს გაიმეორებს.