ე.წ. ციანიდის საქმეზე მსჯავრდებულ გიორგი მამალაძეს თავისი მოძღვარი დეკანოზი ნიკოლოზ გიგატაძე აზიარებს. ამის შესახებ მოძღვარმა აჭარის ტელევიზიასთან საუბრისას განაცხადა.

"როგორც მის მოძღვარს აქამდეც მქონდა ამის სურვილი", — ამბობს დეკანოზი.

დეკანოზ გიორგი მამალაძის ოჯახის წევრების და მხარდამჭერების ორგანიზებით 4 თებერვალს საპატრიარქოსთან აქცია გაიმართა. დეკანოზის ძმა, თორნიკე მამალაძე განმარტავდა, რომ დაკავებული საპატრიარქოს გარკვეული ჯგუფების ტყვეა. ის დეკანოზის ზიარებას და მის დაუყოვნებლივ გათავისუფლებას ითხოვდა. მამალაძის მხარდამჭერებმა საპატრიარქოსთან კარვები გაშალეს. მათი თქმით, საპატრიარქოსგან რეაგირებას დაელოდებოდნენ, შემდეგ კი გეგმას დაისახავდნენ.

ზიარების მოთხოვნით გამართული აქცია საპატრიარქომ ეკლესიაზე ზეწოლად შეაფასა. თუმცა, პატრიარქმა გადაწყვიტა დეკანოზის ზიარების უფლება მისცეს იმ მღვდელმსახურებს, ვინც "პასუხისმგებლობას" მხოლოდ საკუთარ თავზე აიღებენ.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.