შინაგან საქმეთა სამინსიტროს ინფორმაციით, 2018 წელს არასრულწლოვანთა მიმართ ჩადენილი სქესობრივი დანაშაულის ბრალდებით 116 პირი ამხილეს. უწყებაში ამბობენ, რომ მათ შორის 4 პირი გაუპატიურებაში, 24 გარყვნილ ქმედებაში, 2 სხვაგვარი სექსუალური ხასიათის ქმედების ჩადენაში, 86 კი 16 წლის ასაკს მიუღწეველ პირთან ნებაყოფლობით სექსუალურ კავშირში ამხილეს.

უწყებაში განმარტავენ, რომ შეიმუშავეს საკანონმდელბლო ცვლილებების პაკეტი, რომელიც ითვალისწინებს სქესობრივი დანაშაულის ჩამდენ პირთა მიმართ სასჯელის გამკაცრებას. კერძოდ, სასჯელაღსრულების დაწესებულების დატოვების შემდგომ, დანაშაულის ჩამდენ პირებს აეკრძალებათ სასწავლო, სააღმზრდელო დაწესებულებებში მუშაობა, ასეთ დაწესებულებებში ყოფნაც. კანონპროექტი ასევე ითვალისწინებს მსგავსი დანაშაულისთვის მსჯავრდებულ პირთა ბაზის შექმნას.

მათივე თქმით, სექსუალური ძალადობის მსხვერპლთა ხელახალი ვიქტიმიზაციის თავიდან აცილების მიზნით, შეიქმნა მოწმისა და დაზარალებულის კოორდინატორის ინსტიტუტი, რომელიც თებერვლიდან პილოტურად ამოქმედდება. უწყების განამრტებით, ინსტიტუტის მიზანი გამოძიების მიმდინარეობისას მსხვერპლთა ფსიქოლოგიური მხარდაჭერა და მათთვის სამართალწარმოების პროცესში მონაწილეობის გამარტივებაა.