აჭარის მთავრობის თავმჯდომარის, თორნიკე რიჟვაძის განცხადებით ბათუმში, "მუყაოს" ე.წ. ოცნების ქალაქში მაცხოვრებლებისთვის საცხოვრებელი კორპუსები აშენდება. ამის შესახებ მან დღეს, 6 თებერვალს გამართულ საგანგებო ბრიფინგზე ისაუბრა:

"იქ ახალ სიცოცხლეს შეიძენს დასახლება და ე.წ. ოცნების ქალაქი გახდება მართლაც ახდენილი ოცნებების ქალაქი".

რიჟვაძის თქმით, ბინები ეტაპობრივად აშენდება და გადაეცემა მოსახლეობას. მისივე ცნობით, ფაქტობრივად უკვე დასრულებულია ტერიტორიაზე არსებული ნაგებობების აღწერა.

აჭარის მთავრობის თავმჯდომარის განმარტებით, ფინანსთა და ეკონომიკის მინისტრებს დაევალებათ მოამზადონ მშენებლობის როგორც საპროექტო, ასევე სამშენებლო დოკუმენტაცია და დღესვე დაიწყება სამშენებლო სამუშაოებისთვის მომზადება.

რიჟვაძის თქმით, პროექტი, როგორც ადგილობრივი ასევე, ცენტრალური ბიუჯეტიდან დაფინანსდება, რისთვისაც ჯამში დაახლოებით 10 მილიონი ლარია გათვალისწინებული.

"მუყაოს ქალაქი" ხელვაჩაურში, 25-ე და 53-ე ბატალიონების ყოფილ ტერიტორიაზე 2012 წლის არჩევნების შემდეგ გაჩნდა. სახელდახელოდ აგებულ ფიცრულებში ათასობით ადამიანი შესახლდა. მათი ნაწილი ეკომიგრანტია. ტერიტორიის თვითნებურად დაკავების პროცესი წლების განმავლობაში გრძელდებოდა.