ქართული წიგნის ეროვნული ცენტრის ინფორმაციით, გამომცემლობა Ciconia.ciconia-მ გერმანულ ენაზე გამოსცა "პეტრე ოცხელი".

წიგნში ტექსტის ავტორია კოტე ჯანდიერი, წინასიტყვაობა კი გიორგი კალანდიას, ვლადიმირ ველმინსკის და ვადიმ ზახაროვს ეკუთვნით. წიგნში 100-ზე მეტი ილუსტრაცია და სხვადასხვა დოკუმენტური მასალაა შესული.

წიგნის ყდად ოცხელის ერთ-ერთი სკეტჩი "მფრინავი მღებავია" გამოყენებული.

ლეგენდარული მხატვრის 110 წლის იუბილესთან დაკავშირებით, 2017 წელს ოცხელის 30 ნამუშევარი სრულად აღადგინა თიბისი ბანკმა, რომელთა დიდი ნაწილი ფართო საზოგადოებამ პირველად იხილა. ნამუშევრები გამოიფინა თიბისი გალერეაში და ავტობუსის გაჩერებებზე. კოლექციის ნაწილი გამოჩნდა Google-ის ონლაინ მუზეუმშიც.