2018 წლის 2 დეკემბერს, გაერთიანებული ოპოზიციის აქციამდე დაკავებული 7 პირიდან 5-ს აღკვეთის ღონისძიება პატიმრობიდან გირაოზე შეეცვალა. თბილისის საქალაქო სასამართლოს გადაწყვეტილებით მათ 2-ათას ლარიანი გირაო გადაიხადეს და სასამართლო დარბაზიდან გათავისუფლდნენ.

დანარჩენი 2 პირი პატმრობაში რჩება. როგორც On.ge-ს საქალაქო სასამართლოს პრესსამსახურში განუცხადეს, მათი საქმე საპროცესო შეთანხმების გაფორმების მიზნით ცალკე წარმოებად გამოიყო.

უკრაინის 6 და საქართველოს 1 მოქალაქე 2 დეკემბერს სპეცოპერაციის შედეგად დააკავეს. შინაგან საქმეთა მინისტრის, გიორგი გახარიას განცხადებით, არსებობდა ეჭვი, რომ მათ კავშირი ჰქონდათ გაერთიანებული ოპოზიციის აქციასთან. მისივე თქმით, ეჭვები დაკავებულების განცხადებებიდან და სხვადასხვა აქციებზე მათი ვიზიტებიდან გამომდინარე გაჩნდა.

საქმეზე გამოძიება სისხლის სამართლის კოდექსის 236-ე მუხლის მესამე და მეექვსე ნაწილებით მიმდინარეობს. ამ მუხლით სისხლისსამართლებრივი პასუხისმგებლობა დგება, თუ ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღება უკანონოდ ხდება.