ქუთაისის სააპელაციო სასამართლოს თავმჯდომარის, დიმიტრი გვრიტიშვილის განცხადებით, 2017 წლიდან დღემდე არც ერთი საქმე არ განუხილავს.

მისი თქმით, სწორედ, 2017 წელს დაინიშნა იუსტიციის უმაღლეს საბჭოს წევრად და საქმეების განხილვა ფიზიკურად ვერ მოახერხა.

"იქამდე, სანამ ფიზიკურად არ მიწევდა ქუთაისსა და თბილისს შორის ხშირი მიმოსვლა, მე ვიხილავდი საქმეებს. ვაღიარებ, რომ დაახლოებით ერთი წელია საქმე არ განმიხილავს. ეს მოითხოვს დიდ დროს, ელემენტარულად ვერ ვახერხებ, ობიექტური შესაძლებლობა არ მაქვს, რომ მართლმსაჯულება განვახორციელო", — განაცხადა ტოკ-შოუ არჩევანის ეთერში მოსამართლე დიმიტრი გვრიტიშვილმა.

დიმიტრი გვრიტიშვილი ქუთაისის სააპელაციო სასამართლოს თავმჯდომარედ 2015 წელს დაინიშნა. 2017 წლიდან კი იუსტიციის უმაღლესი საბჭოს წევრია. დიმიტრი გვრიტიშვილი ერთ-ერთია იმ 10 მოსამართლიდან, რომელიც იუსტიციის უმაღლესმა საბჭომ უზენაესი სასამართლოს მოსამართლეობის კანდიდატად პარლამენტს წარუდგინა. მას შემდეგ, რაც კრიტერიუმებისა და პროცედურების გარეშე შერჩეულ სიას პოლიტიკურ და არასამთავრობო სივრცეში დაპირისპირება და კრიტიკა მოჰყვა, 10-მა მოსამართლეობის კანდიდატმა, მათ შორის დიმიტრი გვრიტიშვილმა პარლამენტს მიმართა, არ განიხილონ მისი კანდიდატურა უზენაესის მოსამართლის კანდიდატურაზე.