ბათუმის მერიაში ამბობენ, რომ წერეთლის ქუჩის გარემოვაჭრეებთან შეთანხმება შედგა. მათი ინფორმაციით, გარემოვაჭრეებმა მერიისგან პირობა მიიღეს, რომ ავტოსადგურის გარე პერიმეტრზე ჯიხურებს დაუდგამენ და იქ შეძლებენ ვაჭრობას.

ბათუმის მუნიციპალური სერვისების სააგენტოს დირექტორის, ჯუმბერ კობალაძის თქმით, გარემოვაჭრეებს თავად ავტოსადგურის მეპატრონე დაპირდა, რომ გარე პერიმეტრის მოწესრიგებას თებერვლიდან დაიწყებს.

"თანამედროვე ჯიხურებს ავტოსადგურის გარე პერიმეტრზე განვათავსებთ და მოსახლეობას ამ სავაჭრო ფანჩატურებში გადავიყვანთ. ნაწილი გადავიდა, ნაწილი ახლა გადადის. ყველა გარემოვაჭრე დაკმაყოფილდება. გაცილებით უკეთეს პირობებში იქნებიან, ვიდრე წარმოუდგენიათ", — ამბობს კობალაძე On.ge-სთან.

27 იანვარს, ბათუმის მერიის თანამშრომლებმა წერეთლის ქუჩაზე გარემოვაჭრეების დახლები და ჯიხურები აიღეს, რასაც ხმაური მოჰყვა. გარემოვაჭრეებმა გუშინ, 28 იანვარს ბათუმის მერიასთან აქცია გამართეს და წერეთლის ქუჩაზე ორი თვით ვაჭრობის გაგრძელების ნებართვა მოითხოვეს.