ქართული ოცნების ოფისში მოსამართლეების შერჩევის წესთან დაკავშირებით ორდღიანი შეხვედრა დასრულდა. მმართველი გუნდის წევრები ამბობენ, რომ შეხვედრები ნაყოფიერი და შედეგიანი იყო.

საკითხები, რაზეც უმრავლესობა შეთანხმდა

  • ახალი წესითა და კრიტერიუმებით შერჩეულ მოსამართლეობის კანდიდატურებზე ინდივიდუალურად იმსჯელებენ;
  • იუსტიციის უმაღლეს საბჭოში კანდიდატები ღია კონკურსის წესით მოხვდებიან;
  • ყველა მსურველს მიეცემა თავისი თავის ნომინირებისა და ამ კონკურსში მონაწილეობის უფლება;
  • ყველა კანდიდატი კეთილსინდისიერების კრიტერიუმით განიხილება როგორც საპარლამენტო კომიტეტებში, ასევე, პარლამენტის პლენარულ სხდომაზე;
  • პარლამენტის ყველა წევრი კენჭისყრის დროს ინდივიდუალურად მიიღებს გადაწყვეტილებას.

გარდა ამისა, ეკა ბესელიას აზრით, მოსამართლეობის არჩევის პროცესი სრულად პარლამენტში უნდა გადავიდეს, გარდა იმ ნაწილისა, რომელიც კონსტიტუციურად იუსტიციის უმაღლეს საბჭოს ეხება. მას მიაჩნია, რომ საბჭომ პარლამენტში იმაზე მეტი კანდიდატი უნდა წარადგინოს, ვიდრე ვაკანტური ადგილია. ის განმარტავს, რომ პოლიტპატიმრების საქმეები და სტრასბურგის მიერ გამოვლენილი დარღვევები მოსამართლეების არჩევის გამომრიცხავი ფაქტორი უნდა იყოს.