შინაგან საქმეთა სამინისტრომ მხოლოდ 2019 წლის იანვრის დასაწყისში მიიღო ინფორმაცია, რომ სიცოცხლის გაუფრთხილებლობით მოსპობის ბრალდებით დიდ ბრიტანეთში გასამართლებული ჯეკ შეფერდი, სავარაუდოდ, იმყოფებოდა საქართველოს ტერიტორიაზე. ამის შესახებ ჟურნალისტებს შსს-ს კრიმინალური პოლიციის დეპარტამენტის დირექტორმა ვლადიმერ ბორცვაძემ განუცხადა.

მისივე ცნობით, ჯეკ შეფერდმა 2018 წლის მარტში გადმოკვეთა საქართველოს საზღვარი, მაშინ როდესაც მის მიმართ საერთაშორისო ძებნა გამოცხადებული არ იყო.

"ქართული მხარის ინიციატივით და ბრიტანულ მხარესთან აქტიური თანამშრომლობით, 2019 წლის 12 იანვარს, ჯეკ შეფერდის მიმართ გამოცხადდა საერთაშორისო ძებნა, რის შემდგომაც აქტიურად დაიგეგმა და ხორციელდებოდა ოპერატიულ-სამძებრო ღონისძიებები ძებნილი პირის დაკავების მიზნით", — განაცხადეს შსს-ში.

ვლადიმერ ბორცვაძის ცნობით, ძებნის გამოცხადებიდან 10 დღეში, ჯეკ შეფერდი იძულებული გახდა პოლიციაში მისულიყო, რადგან საერთაშორისო ძებნის გამოცხადების შემდეგ, ის ვეღარ გადაკვეთდა სახელმწიფო საზღვარს და ამავდროულად, მისი დაკავების მიზნით, ქართველი სამართალდამცველების მიერ ინტენსიურად მიმდინარეობდა ოპერატიული ღონისძიებები.

"მიუხედავად იმისა, რომ პოლიციაში გამოცხადებამდე მან აიყვანა ადვოკატები და მიმართა მედიას, მის მიმართ განხორციელდება შესაბამისი სამართლებრივი პროცედურები", — აცხადებენ უწყებაში.

ინტერპოლით ძებნილ შეფერდს, რომელიც თბილისში მარტიდან იმალებოდა საქართველოს შინაგან საქმეთა სამინისტროც ეძებდა. რუსთავი 2-ის ინფორმაციით, ის პოლიციაზე ადრე აღმოაჩინეს. ტელევიზიასთან ინტერვიუში შეფერდმა განაცხადა, რომ გამოძიებასთან თანამშრომლობას აპირებს ამიტომ საკუთარი სურვილით, ადვოკატებთან ერთად ვაკე-საბურთალოს განყოფილებაში მივიდა და პოლიციას ჩაბარდა.

23 იანვარს BBC-მ გაავრცელა ინფორმაცია, რომ შეფერდი ქალის არაგანზრახ მკვლელობაში იყო ბრალდებული და თბილისში იმალებოდა. გამოცემა წერდა, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი დაიღუპა.

შეფერდი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, შეფერდმა პასუხი აგოს.