ოპოზიციის ლიდერის, ხუან გუაიდოს პრეზიდენტად აღიარების გამო, ვენესუელის პრეზიდენტმა, ნიკოლას მადურომ ამერიკასთან დიპლომატიური ურთიერთობები შეწყვიტა. The Washington Post-ის ინფორმაციით, მადურომ 72 საათი მისცა ამერიკელ დიპლომატებს ქვეყნის დასატოვებლად.

"ამერიკის შეერთებული შტატების იმპერიალისტი მთავრობა ცდილობს სახელმწიფო გადატრიალება მაოხდინოს ჩვენთან და პრეზიდენტად დანიშნოს მარიონეტი, რომლის კონტროლსაც შეძლებს... მე გადავწყვიტე გავწყვიტო დიპლომატიური ურთიერთობა აშშ-სთან. წადით აქედან! დატოვეთ ვენესუელა! ჩვენც გვაქვს სიამაყე", — განცხადება მადურომ პრეზიდენტის სასახლიდან გააჟღერა, სადაც მისი ათასობით მხარდამჭერია შეკრებილი.

ამერიკის შეერთებული შტატების პრეზიდენტმა, დონალდ ტრამპმა მხარი დაუჭირა ვენესუელის პარლამენტის თავმჯდომარეს, ხუან გუაიდოს, რომელმაც თავი ვენესუელის პრეზიდენტის მოვალეობის შემსრულებლად გამოაცხადა. სპეციალურ განცხადებაში ტრამპმა აღნიშნა, რომ ქვეყნის ლეგიტიმური მმართველი ახლა გუაიდოა და არა ნიკოლას მადურო. CNN-ის ინფორმაციით, ტრამპმა სხვა ქვეყნების ლიდერებსაც მოუწოდა, რომ დაგმონ ნიკოლას მადუროს რეჟიმი და ვენესუელის პრეზიდენტის მოვალეობის შემსრულებლად გუაიდო დაასახელონ.

ბოლო სამი დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს. კარაკასში გამართულ მიტინგზე გუაიდომ მადურო არალეგიტიმურ პრეზიდენტად გამოაცხადა. გუაიდომ აღნიშნა, რომ ხელისუფლების უზურპაციის დასასრულებლად და სამართლიანი არჩევნების ჩასატარებლად პრეზიდენტის მოვალეობებს გარდამავალ პერიოდში თავად შეასრულებს.

ადგილობრივი მედიის ინფორმაციით, ბოლო დღეებში მიმდინარე საპროტესტო აქციებს სულ 4 ადამიანი ემსხვერპლა. პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. საპროტესტო მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლად ნიკოლას მადუროს წინააღმდეგ.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებასაც.

ამავე თემაზე: