იუსტიციის უმაღლესი საბჭოს არამოსამართლე წევრის, ნაზი ჯანეზაშვილის შეფასებით, უზენაესი სასამართლოს მოსამართლეობის 10-ვე კანდიდატის ერთობლივი განცხადება მოწმობს იმას, რომ "კლანი" მუშაობს. ასე შეაფასა ჯანეზაშვილმა მოსამართლეობის კანდიდატების განცხადება, სადაც ჩინჩალაძე, მურუსიძე და კიდევ 8 კანდიდატი პარლამენტს მოუწოდებს, მათი კანდიდატურები არ განიხილოს.

მისივე განცხადებით, მოსამართლეობის კანდიდატების ამ განცხადებას არანაირი შედეგი არ მოჰყვება, რადგან შედეგი უკვე დადგა.

"პარლამენტის თავმჯდომარემ, პირველმა ვიცე-სპიკერმა და არაერთმა დეპუტატმა მოგვიანებით თქვეს, რომ კენჭისყრაზე ეს სია არ გავიდოდა. თითქმის ერთი თვე გავიდა მას შემდეგ, რაც საბჭომ კანდიდატურების შესახებ გადაწყვეტილება მიიღო და სია წარადგინა პარლამენტში. გაუგებარია, რატომ აკეთებენ ამ განცხადებას დღეს", — ამბობს ჯანეზაშვილი On.ge-სთან.

მისი თქმით, უახლოეს დღეეებში ჩანიშნულია მოსამართლეთა კონფერენცია, რომლის ძირითად და ერთადერთ საკითხად განიხილება იუსტიციის უმაღლესი საბჭოს ირგვლივ განვითარებული მოვლენები. ჯანეზაშვილი მიიჩნევს, რომ კონფერენციაზე პოზიციას დააფიქსირებენ და ეს განცხადება სწორედ წინასაკონფერენციოდ გაავრცელეს.

"სახელიც დაირქვეს იმგვარი, რომ თამაშიდან, ამ პროცესიდან გადიან, თითქოს, თავისი ნებით... არადა უკვე დაგვიანებულია მათი განცხადება. ეს რომ გაეკეთებინათ პარლამენტის თავმჯდომარის ან ვიცე-სპიკერის განცხადებამდე, მაშინ კარგი და გასაგები იქნებოდა, მაგრამ ახლა დაგვიანებული და აზრს მოკლებულია", — აღნიშნავს ჯანეზაშვილი.

ის დასძენს, რომ თუ მოსამართლეობის ამ კანდიდატებს სურვილი ექნებათ, შეუძლიათ, კვლავ მიმართონ საბჭოს. ამიტომ მისივე თქმით, ეს არ ნიშნავს, რომ მათ უზენაესი სასამართლოს მოსამართლეობაზე პრეტენზია არ აქვთ.

დღეს, 21 ნოემბერს უზენაესი სასამართლოს მოსამართლეობის ათივე კანდიდატმა პარლამენტს მოუწოდა, მათი კანდიდატურები არ განიხილონ. საერთო განცხადებაში მოსამართლეობის კანდიდატები არაჯანსაღს უწოდებენ იმ კრიტიკას, რომელიც მათ წინააღმდეგ გამოითქმებოდა, მათ შორის პარლამენტში.

დაპირისპირება მოსამართლეების გარშემო

უზენაესი სასამართლოს უვადო მოსამართლეების კანდიდატთა სია იუსტიციის უმაღლესმა საბჭომ 2018 წლის დეკემბრის ბოლოს წარადგინა. სიას მხარს არ უჭერდნენ საბჭოს არამოსამართლე წევრები ნაზი ჯანეზაშვილი და ანა დოლიძე. ისინი და სამოქალაქო სექტორი მოსამართლეობის ზოგიერთ კანდიდატს ე.წ. ჩინჩალაძე-მურუსიძის კლანის წევრებად მოიხსენიებდნენ.

საბჭოს მიერ წარდგენილი მოსამართლეების სია და ეკა ბესელიას მიერ იურიდიულ საკითხთა კომიტეტის დატოვება დაპირისპირების მიზეზი გახდა მმართველ პარტიაში. წასვლის მიზეზებზე საუბრისას ბესელიამ განაცხადა, რომ საქართველოს პარლამენტის თავმჯდომარემ, ირაკლი კობახიძემ მას მოსთხოვა, კომიტეტს მოსამართლეების სია პარლამენტში დარეგისტრირებიდან მეოთხე დღეს განეხილა და მისთვის მხარი დაეჭირა. დეპუტატის თქმით, სწორედ ამ მიზეზით დატოვა იურიდიულ საკითხთა კომიტეტის თავმჯდომარის პოსტი და ამით უზენაესი სასამართლოს მოსამართლეების სიის დამტკიცებას შეუშალა ხელი.

ბესელიამ აღნიშნა, რომ იუსტიციის უმაღლესი საბჭოს მიერ წარდგენილ სიაში მყოფი მოსამართლეები ნაციონალური მოძრაობის "დანაშაულებრივ რეჟიმს" უკავშირდებოდნენ და მათი არჩევა სასამართლო სისტემისა და ქართული ოცნების ღირებულებების ნგრევისკენ გადადგმული ნაბიჯი იქნებოდა.

ამავე თემაზე: