"კიდევ ერთხელ გამოჩნდა, რომ მათ ამოძრავებთ პირადი ინტერესები", — ამის შესახებ იუსტიციის უმაღლესი საბჭოს მდივანმა დღეს, 21 იანვარს არასამთავრობოების აქციაზე გაჟღერებული მოთხოვნების საპასუხოდ ჟურნალისტებს განუცხადა.

გიორგი მიქაუტაძის თქმით, მოსამართლეებისა და იუსტიციის უმაღლესი საბჭოს მიზანმიმართული დევნა ხორციელდება:

"არანაირ კრიტერიუმსა და რეგულაციებზე საუბარი მათ არ სურთ. მიზანი და მიზეზი არის ერთადერთი რომ ჰქონდეთ გავლენა პროცესებზე, რომელიც მიმდინარეობს იუსტიციის უმაღლეს საბჭოში და კონკრეტული კანდიდატების შერჩევისას იყოს მათი მხრიდან ჩარევა. თუ უზენაესი სასამართლოს მოსამართლეობის კანდიდატები იქნებიან არასამთავრობო ორგანიზაციებიდან, ისე როგორც ეს აქამდე ხდებოდა, მაშინ კმაყოფილები იქნებიან. თუ იუსტიციის უმაღლესი საბჭო და საერთო სასამართლოების სისტემა დამოუკიდებლად წარადგენს კანდიდატებს, რა თქმა უნდა, იწვევს მათ უკმაყოფილებას".

იუსტიციის უმაღლეს საბჭოსთან არასამთავრობო ორგანიზაციებმა, ყოფილმა მოსამართლეებმა და იუსტიციის საბჭოს არამოსამართლე წევრებმა საბჭოს შენობასთან აქცია გამართეს და მანიფესტი შეიმუშავეს.

"სასამართლოს შიგნით ძალაუფლება ხელში ჩაიგდო პირთა იგივე ჯგუფმა, "კლანმა, რომლის მეშვეობითაც წინა ხელისუფლება ტოტალურად აკონტროლებდა სასამართლოს... ბოლო წლების გამოცდილება ადასტურებს, რომ კლანი სისტემატურად არღვევს ან არაკეთილსინდისიერად განმარტავს კანონს, ბოროტად იყენებს საკანონმდებლო ხარვეზებს. შეუძლებელია კლანის მიერ მიღებული გადაწყვეტილების გაუქმება ან შეცვლა სამართლებრივი გზით, რადგანაც სასამართლო სისტემას ის თავად აკონტროლებს", — ნათქვამია მანიფესტში.