საქართველოს სასჯელაღსრულებისა და პრობაციის სამინისტრო ადვოკატთა პროფესიული ეთიკის კომისიას საჩივრით მიმართავს, ადვოკატ ალექსანდრე კობაიძის მიმართ დისციპლინური პასუხისმგებლობის დაკისრების მიზნით.

სამინისტრო აცხადებს, რომ რუსთავის სასამართლოდან გაქცეული პატიმრის ადვოკატის განცხადება არღვევს ადვოკატთა შესახებ საქართველოს კანონისა და ადვოკატთა პროფესიული ეთიკის კოდექსის ნორმებს და წარმოადგენს არაპროფესიულ დამოკიდებულებას საადვოკატო საქმიანობისადმი:

"მისი განცხადება შეიცავს წაქეზებას პენიტენციურ დაწესებულებებში განთავსებული პირების მიმართ არასამართლებრივი ხერხებით თავი დააღწიონ სასჯელის მოხდას და არ დაემორჩილონ დაწესებულებებში დადგენილ წესებს. ამასთან, განცხადება საფრთხის შემცველია პენიტენციური სისტემის გამართული ფუნქციონირებისთვის და მიმართულია სისტემის დისკრედიტაციისკენ".

სამინისტროს განმარტებით, პენიტენციურ სისტემაში მსჯავრდებულები იყოფიან საშიშროების ოთხ რისკად - დაბალი, საშუალო, მომეტებული და მაღალი - დაწესებულებებში მათი მოთავსება საშიშროების რისკის შესაბამისად ხდება.

მათივე განცხადებით, პატიმარი ოთარ ვარამაშვილი საშიშროების მაღალი რისკის მქონე მსჯავრდებულია, ის სასჯელს სწორედ N6 პენიტენციურ დაწესებულებაში იხდიდა. სამინისტრო განმარტავს პატიმრის სასამართლოში მიყვანის მიზეზს:

"სასჯელის მოხდის პერიოდში ხშირად არღვევდა სარეჟიმო მოთხოვნებს. პენიტენციურ დაწესებულებებში, საქართველოს კანონმდებლობით დადგენილი მოთხოვნების დარღვევის შემთხვევაში, პატიმრის მიმართ შესაძლებელია გამოყენებულ იქნას სხვადასხვა დისციპლინური სახდელი, მათ შორის სატელეფონო საუბრის უფლების შეზღუდვა არაუმეტეს 3 თვის ვადით. ბრალდებულს/მსჯავრდებულს უფლება აქვს, დისციპლინური ღონისძიების გამოყენების შესახებ განკარგულება გაასაჩივროს სასამართლოში. სწორედ აღნიშნული უფლება გამოიყენა მსჯავრდებულმა ოთარ ვარამაშვილმა და 2016 წლის 31 აგვისტოს პატიმარი გაყვანილ იქნა რუსთავის საქალაქო სასამართლოში".

უწყების ცნობით, N6 პენიტენციური დაწესებულება არის განსაკუთრებული რისკის თავისუფლების აღკვეთის დაწესებულება, სადაც საშიშროების მაღალი რისკის მქონე მსჯავრდებულები არიან განთავსებულნი და დაწესებულებაში მიღებულია უსაფრთხოების განსაკუთრებული ზომები.

ვარამაშვილის ადვოკატმა ალექსანდრე კობაიძემ განაცხადა, რომ მის [ოთარ ვარამაშვილის] ადგილას ისიც გაიქცეოდა, რადგან პატიმრები და მსჯავრდებულები არასათანადო პირობებში იმყოფებიან.