რუსი მომღერალი დიმა ბილანი ქვეყანაში ისეთი სტრუქტურების შექმნას ითხოვს, რომელიც მუსიკის ხარისხს შეამოწმებს, რათა ესტრადაზე "ყველაფერი დაშვებული არ იყოს".

"დასავლურ მუსიკაში ახლა რაღაც ქაოსია. თუ შესაძლებელია, რომ რამენაირად ჩვენი ქვეყნის ტრადიციებს მივყვეთ, რათა არ გადავეშვათ აბსოლუტურ "თრეშში". უნდა იყოს სტრუქტურები, რომლებიც ამ ყველაფერს გააკონტროლებენ. მიუხედავად იმისა, რომ მსოფლიოსთვის ღია ვარ, რაც ახლა ხდება გადაჭარბებაა", — აღნიშნა რუსმა მომღერალმა.

BBC-ის ინფორმაციით, ბილანის განცხადებას არაერთგვაროვანი რეაქცია მოჰყვა. დუმაში ლიბერალურ-დემოკრატიული პარტიის წარმომადგენელმა, ბორის ჩერნიშოვმა მომღერალს ღია წერილით მიმართა და მისი იდეის წინააღმდეგ გამოვიდა.

"თქვენი იდეა უბიძგებს სამჭოური სამხატვრო კომიტეტების მოგონებებისკენ, რომლებმაც დაღუპეს ასობით სიმღერა და საცეკვაო კომპოზიცია, რომელმაც მაყურებლამდე ვერ მიაღწია", — წერს დეპუტატი.

რუსულ ესტრადაში აღმოჩნდნენ ისეთებიც, რომლებიც ბილანის იდეას მხარი დაუჭირეს. მაგალითად, პროდიუსერი იოსიფ პრიგოჟინი საზოგადოებრივ ადგილებში გინებაზე ჯარიმის დაწესებას ითხოვდა. მომღერალს მხარი დაუჭირა მმართველი პარტიის დეპუტატმა, ნიკოლაი ზემცოვმა.

"მზად ვარ ამ საქმეში საპარლამენტო დონეზე ჩავერთო. თუ მას სურს რაიმეს აკრძალვა იქიდან, რასაც მისი კოლეგები აკეთებენ, მაშინ, მოდით, დავეხმაროთ", — აღნიშნა დეპუტატმა.

2018 წლის ბოლოს რუსეთში მასობრივად ჰიპ-ჰოპ შემსრულებლების კონცერტები გააუქმეს. რეპერები ხელისუფლების მხრიდან ცენზურაზე საუბრობენ.

ახალგაზრდებში ჰიპ-ჰოპ მუსიკის პოპულარობის ზრდით შეშფოთებულია რუსეთის პრეზიდენტი ვლადიმერ პუტინი. პრეზიდენტმა განაცხადა, რომ აკრძალვის ნაცვლად, კულტურის ლიდერებმა რეპი უნდა აკონტროლონ.