რუსეთის პრეზიდენტი ვლადიმერ პუტინი ადგილობრივ ახალგაზრდებში ჰიპ-ჰოპ მუსიკის პოპულარობის ზრდით შეშფოთებულია. ის ამბობს, რომ აკრძალვის ნაცვლად, კულტურის ლიდერებმა რეპი უნდა აკონტროლონ:

"თუ მისი შეჩერება შეუძლებელია, მაშინ ჩვენ ის უნდა ვმართოთ".

პუტინმა სანქტ-პეტერბურგში გამართულ შეხვედრაზე თავისი მოსაზრება განმარტა და თქვა, რომ ჰიპ-ჰოპ არტისტების აკრძალვას საწინააღმდეგო ეფექტი ექნება და ეს მათ პოპულარობას კიდევ უფრო გაზრდის.

"რეპი სამ რამეზეა დაფუძნებული: სექსზე, ნარკოტიკებზე და პროტესტზე", - ამბობს რუსეთის პრეზიდენტი და დასძენს, რომ ჰიპ-ჰოპის ეს მიმდინარეობა რუსი ერის დეგრადაციას გამოიწვევს.

პუტინის სიტყვებით, ნარკოტიკების პროპაგანდა წყევლაზე უარესია.

რუსეთის პრეზიდენტის განცხადება რუსი რეპერის, Husky-ის დაპატიმრებას მოჰყვა. ხელოვანი, რომლის ვიდეოებსაც YouTube-ზე მილიონობით ნახვა აქვს, ნოემბერში დააპატიმრეს. მან სპონტანური ჩვენება მოაწყო რუსეთის სამხრეთში მდებარე ქალაქ კრასნოდარში.

25 წლის რეპერის დაპატიმრება საბჭოთა კავშირის დროს ხელოვნებაზე დაწესებულ ცენზურას შეადარეს. ჰასკი სიღარიბეზე, კორუფციასა და პოლიციის სისასტიკეზე რეპავს.

21 ნოემბერს, ის სცენაზე ასასვლელად ემზადებოდა, როდესაც ადგილობრივი პროკურატურის წარმომადგენლებმა მას გაფრთხილება მისცეს, იმ მოტივით, რომ მისი ქმედება "ექსტრემიზმის" ელემენტებს მოიცავდა.

ჰასკი მანქანაზე აძვრა, მის გარშემო ასობით ფანი იყო და გარეპა:

"მე ჩემს მუსიკას ვიმღერებ, ის ყველაზე გულწრფელია". ამის შემდეგ, ხელოვანი მანქანიდან პოლიციამ ჩამოიყვანა და დააპატიმრა.

30 ნოემბერს, რეპერმა Gone.Fludd-მა თავისი ორი კონცერტი გააუქმა, რაც პოლიციისგან არსებულ წნეხს დაუკავშირა. შოუ გააუქმა პოპულარულმა ჰიპ-ჰოპ არტისტმა Allj-მაც. მისი თქმით, მიზეზი მიღებული მუქარები იყო. ნოემბერში კონცერტები გააუქმეს პანკ-ბენდმა Friendzona-მ და მუსიკოსმა Monetochka-მაც.