შინაგან საქმეთა სამინისტრომ პოლიციელებზე თავდასხმის ბრალდებით ძებნილი პირი წალკის რაიონის სოფელ ტბეთში დააკავა. გამოძიების ვერსიით, ალკოჰოლის ზემოქმედების ქვეშ მყოფმა პირმა 6 დეკემბერს, გვიან ღამით, აბაშაში აგრესია გამოხატა უბნის ინსპექტორ-გამომძიებლების — შალვა მიმინოშვილისა და ბაკურ ჭკადუას მიმართ.

უწყების მტკიცებით, ბრალდებული არ დაემორჩილა პოლიციელების მოთხოვნას დაეცვა წესრიგი და ორივე მათგანს ცივი იარაღით სხეულზე დაზიანებები მიაყენა. ბრალდებული შემთხვევის ადგილიდან მიიმალა. დაშავებული პოლიციელები სტაციონარში გადაიყვანეს.

სასამართლომ დაკავებულს აღკვეთის ღონისძიების სახით 2-თვიანი პატიმრობა შეუფარდა. გამოძიება საქართველოს სსკ-ს 353-ე პრიმა მუხლის მე-2 ნაწილით მიმდინარეობს, რაც სამსახურებრივ საქმიანობასთან დაკავშირებით პოლიციელის ჯანმრთელობის ხელყოფას გულისხმობს. დანაშაული 7-დან 11 წლამდე ვადით თავისუფლების აღკვეთას ითვალისწინებს.