რუსეთის უსაფრთხოების სამსახურის განცხადებით, ამერიკის შეერთებული შტატების მოქალაქე მოსკოვში "ჯაშუშობის ბრალდებითაა" დაკავებული. BBC-ის ცნობით, აშშ-ს მოქალაქე პოლ ველანი მოსკოვში, 28 დეკემბერს დაიჭირეს.

რუსეთის უსაფრთხოების სამსახური სხვა დამატებით დეტალებს არ ავრცელებს. როგორც გამოცემა Politico წერს, კომენტარს არ ავრცელებენ არც აშშ-ს საელჩოში, მოსკოვში.

ბრალის დამტკიცების შემთხვევაში დაკავებულს 10-დან 20 წლამდე პატიმრობა ემუქრება. პოლ ველანის დაკავებას წინ უძღოდა დეკემბერში რუსეთის მოქალაქის, მარინა ბუტინას დაკავება აშშ-ში. პროკურრორების ცნობით, რუსმა აქტივისტმა ბრალდება აღიარა. პროკურატურის ცნობით, იგი კონსერვატიულ პოლიტიკურ ჯგუფებთან დაკავშირებული "კრემლის აგენტი იყო", რომელსაც მოსკოვის სასარგებლოდ, აშშ-ს პოლიტიკაზე ზეგავლენა უნდა მოეხდინა.

მანამდე რუსეთი დიდმა ბრიტანეთმა და აშშ-მ დაადანაშაულა ქიმიური იარაღის გამოყენებაში, რისთვისაც აშშ-მ რუსეთს ახალი სანქციები დაუწესა. საქმე ეხება სოლსბერიში ყოფილი რუსი ჯაშუშისა და მისი შვილის მკვლელობის მცდელობას.

სერგეი სკრიპალი შვილთან, იულიასთან ერთად ბრიტანეთის ქალაქ სოლსბერიში 4 მარტს მოწამლეს. ისინი უგონოდ საზოგადოებრივი თავშეყრის ადგილზე მდგარ სკამზე იპოვეს. ბრიტანეთმა მოწამვლაში რუსეთი დაადანაშაულა და საწამლავად ნოვიჩოკი დაასახელა. აღნიშნული საშუალება სასიკვდილო ნივთიერებაა, რომელიც საბჭოთა კავშირმა 1970-80 წლებში გამოუშვა. რუსეთმა საქმეში ყოველგვარი მონაწილეობა უარყო. რამდენიმეკვირიანი კომის შემდეგ ორივე მათგანი გონს მოვიდა და ამჟამად მათ სიცოცხლეს საფრთხე არ ემუქრება.

გაიგეთ მეტი: სერგეი სკრიპალის საქმე