25 წლის ნუცა ღოღობერიძე გახდა პირველი ქალი რეჟისორი საქართველოში და საბჭოთა კავშირში, რომელმაც ფილმი გადაიღო.

კარიერის განმავლობაში სულ სამი სურათი შექმნა, თუმცა მოახერხა და წინ აღუდგა იმპერიას, რომელიც გამუდმებით ცდილობდა ადამიანების შეზღუდვას.

ღოღობერიძის ბოლო, მესამე ფილმი უჟმური დიდი წინააღმდეგობის მიუხედავად, 1934 წლის ბოლოს გამოვიდა ეკრანებზე, თუმცა ცენზურამ ის მალევე გააქრო ისე, თითქოს არც არსებობდა.

სწორედ ამ პერიოდიდან იწყება ნუცას შევიწროება ქმრის, ლევან ღოღობერიძის გამო, რომელიც 1937 წელს დახვრიტეს კიდეც. თავად ნუცა კი კინოდან გააძევეს და ათი წლით გადაასახლეს.

საბჭოთა ცენზურის მიერ ფილმის აკრძალვიდან 85 წლის შემდეგ კი ნუცა ღოღობერიძის ფილმი ეკრანს უბრუნდება.

"ეს ჩემთვის ძალიან ამაღელვებელი მომენტია. ისეთი შეგრძნება მაქვს, თითქოს დედაჩემი სამშობლოში დაბრუნდა. ფილმი არც მე მაქვს ნანახი და ერთი სული მაქვს როდის ვნახავ", - ამბობს On.ge-სთან საუბრისას ნუცა ღოღობერიძის შვილი, რეჟისორი ლანა ღოღობერიძე.

უჟმურის ჩვენება 27 დეკემბერს საქართველოს ეროვნულ არქივში გაიმართება.