KENZO-ს ახალი რეკლამა, შეიძლება ითქვას, რომ აჯანყებაა იმ სტერეოტიპების წინააღმდეგ, რომელიც ფემინურობას ეხება.

ვიდეოს დასაწყისში ჩვენ ვხედავთ მსახიობსა და მოდელ მარგარეტ ქუალის, რომელიც "მაღალი საზოგადოების" წრეში ზის. ეს სტერეოტიპებით სავსე სამყაროა, რომელშიც მდიდარი და წარმატებული მამაკაცების ცოლები ერთმანეთს ჩაცმულობასა და სამკაულების რაოდენობაში ეჯიბრებიან. თავიდანვე ნათელია, რომ მარგარეტის გმირი არასტანდარტული ტიპია, რადგან მწვანე კაბა აცვია იქ, სადაც, აშკარად, უფრო მუქი დრეს-კოდია.

მთავარი გმირი ყალბად და ნაძალადევად იღიმის და შემდეგ დარბაზიდან გადის. იქ სადაც სიცარიელეა, სადაც შეუძლია იყოს ის ვინც არის. სწორედ ამ დროს ირთვება მუსიკა (Sam Spiegel & Ape Drums feat. Assassin Mutant Brain) და მარგარეტი ცეკვას იწყებს.

მაყურებელი მისგან გრაციოზულ, "ლამაზ" და ფემინურ ცეკვას ელის, მაგრამ ის არასტანდარტულ და მოულოდნელ მოძრაობებს იწყებს. თავიდან ცოტა გამაღიზიანებელია, რადგან იმას, რისთვისაც გაემზადეთ, ვერ ნახავთ. მარგარეტი ფრისტაილს ცეკვავს, იმიტომ რომ ასე უნდა. ის არ დაფარფატებს და არ დანარნარებს, ის არ აკეთებს იმას, რასაც თქვენ მისგან ელით და ითხოვთ.

KENZO-ს ახალი მესიჯიც სწორედ ეს არის, ფემინურობა და "ფემინური სუნამო" არის თავისუფლება და არა სტერეოტიპების ბორკილებში ყოფნა.