ე.წ. დეზერტირების ბაზარი ერთ-ერთია იმ პოპულარული ადგილებიდან, საიდანაც საახალწლო სამზადისი იწყება. აქ ხალხმრავლობა უკვე იგრძნობა, საცობია... წინასაახალწლო მზადყოფნაში არიან მოვაჭრეებიც, რომლებიც ფასდან დასმულ კითხვებს სწრაფად პასუხობენ და შევაჭრებისთვისაც მზად არიან. წლის მთავარი კერძის მოსამზადებლად საჭირო "ბიუჯეტი" დეზერტირების ბაზრის პროდუქტების მიხედვით შევადგინეთ.

საცივი

საცივის მოსამზადებლად, პირველ რიგში, ინდაურია საჭირო, რომლის ფასიც 55-დან 120 ლარამდე მერყეობს. ფულის დაზოგვის შემთხვევაში "სოფლის ქათამიც" გამოგადგებათ. მისი ფასი აგრარულ ბაზარში 30-35 ლარის ფარგლებში მერყეობს, ზომაზეა დამოკიდებული.

ნიგვზის ფასს ფერი და ხარისხი განსაზღვრავს. ამ ფაქტორების გათვალისწინებით 15-დან 30 ლარამდე მერყეობს. საცივისთვის ღია ფერის ნიგოზს უწევენ რეკომენდაციას, რომლის შეძენასაც 25-30 ლარად შეძლებთ.

გოზინაყი

საახალწლო სუფრის განუყოფელი ტკბილეული გოზინაყია. თუ გსურთ გემრიელი ნუგბარი გამოგივიდეთ, აუცილებლად ნატურალური თაფლი უნდა შეარჩიოთ, "დეზერტირებში" ერთი კილოგრამი თაფლის ფასი 15-17 ლარია. გოზინაყისთვის მცირედიც საკმარისი იქნება. ბაზარში 4-5 ლარად დაფასოებულ, 300 გრამ თაფლს იპოვით.

გოზინაყის დამზადება მუქი ფერის ნიგვზითაც შეიძლება. ამ შემთხვევაში ფასი იკლებს და 30-ის ნაცვლად 15-20 ლარადაც ნახავთ. დამტვრეულ ლებნების შემთხვევაში კიდევ უფრო ნაკლებს გადაიხდით.

საბოლოოდ, ქართული ტიპური საახალწლო სუფრისთვის ერთი საშუალო ზომის ქათმით, ნახევარი კილოგრამი ნიგვზითა და სხვა სანელებლებით საცივის მომზადება, დაახლოებით, 50-55 ლარი დაგიჯდებათ. გაცილებით ძვირია ინდაურის საცივი. მისი ფასი, მოზრდილი, 120-ლარიანი ინდაურითა და ნახევარი კილოგრამი ნიგვზით (15 ლარი), შესაძლოა, 140-150 ლარამდეც კი ავიდეს. 300 გრამი თაფლითა და დაახლოებით 250 გრამი ნიგვზით გოზინაყის მოსამზადებლად აუცილებლად 10 ლარი უნდა გადადოთ.