შინაგან საქმეთა მინისტრმა, გიორგი გახარიამ საპარლამენტო მოსმენისას დასკვნითი სიტყვაში დეპუტატები რიგი საკითხების პოლიტიზირებისთვის გააკრიტიკა და არჩევნების პროცესში სამართალდამცველების რეაგირებას გაუსვა ხაზი.

"როგორც ჩანს, ნელ-ნელა ხდება გააზრება იმ პასუხისმგებლობის,
რისი აღებაც გვიწევს. ბატონებო, როდესაც თქვენ აიღეთ პასუხისმგებლობა სარალიძის შემთხვევის, რომელიც ყველაზე ღირსეულად იჯდა აქ და ყველაზე ღირსეულად მოითმინა ის ყველაფერი, რაც აქ ხდებოდა - აქედან წამოგეღოთ უზარმაზარი პოლიტიკური დივიდენდები, იცოდეთ, რომ პასუხისმგებლობის აღებაც მოგიწევთ", — განაცხადა გახარიამ.

მისივე განცხადებით, იმედი აქვს, რომ ოპოზიციას "პასუხისმგებლობა ეყოფა და საპარლამენტო კონტროლსაც ზუსტად იგივენაირად არ მოექცევა, როგორც საგამოძიებო კომისიას.

"მე როდესაც აქ დღეს მოვდივარ და ვემზადები შინაარსობრივი საუბრისთვის და აქ მიწევს რაღაც პოლიტიკური სპეკულაციების მოსმენა, სამწუხაროდ, გული მწყდება. მინდა იცოდეთ ერთი რამ, არც ერთ შემთხვევაში არ მივიღებ თქვენს პრეტენზიას შერჩეულ სამართალთან დაკავშირებით. თქვენ განათლებული ხალხი ხართ და იცით ერთი რამ - ვერცერთ შემთხვევაში, ვერცერთი საერთაშორისო ორგანიზაციის დასკვნაში ვერ ნახავთ ვერც ერთ შენიშვნას, შინაგან საქმეთა სამინისტროს მიმართ", — განაცხადა შს მინისტრმა.

შინაგან საქმეთა მინისტრი, გიორგი გახარია პარლამენტში დეპუტატების წინ მოხსენებით წარსდგა და შემდეგ კითხვებს უპასუხა. საპარლამენტო უმრავლესობასა და ოპოზიციას ყველაზე მეტი კითხვა ხორავას ქუჩის საქმის გამოძიებაზე ჰქონდა. ასევე დეპუტატები დაინტერესდნენ წინაასაარჩევნო პერიოდში მომხდარი ინციდენტების გამოძიებით და ველისციხეში მომხდარი დაპირისპირებისა და შსს-ს ქმედებების მოტივით.