საქართველოს შინაგან საქმეთა მინისტრის მოადგილის, ნათია მეზვრიშვილის თქმით, განცხადებები, რომ გურჯაანის სასამართლოსთან ქალი პოლიციელები არ უნდა მდგარიყვნენ მათი როლის დაკნინებაა.

მეზვრიშვილის განცხადებით, შსს-ში საკმაოდ მაღალ თანამდებობებს ქალები იკავებენ, მათ შორის მინისტრის ორი მოადგილე ქალია.

"ეს მიუთითებს ამ საკითხის პრიორიტეტულობაზე. ამ საკითხზე აპელირება აკნინებს ქალის როლს პოლიციაში, რადგან მათ ისევე კარგად შეუძლიათ მართლწესრიგის დაცვა და საპოლიციო ფუნქციების შესრულება, როგორც კაცებს", — განაცხადა მეზვრიშვილმა.

მისივე თქმით, პირადად დაინტერესდება იყო თუ არა გამოწვეული აქციაზე ქალი პოლიციელების ყოფნა სექსიზმით.

"რაც შეეხება შეკითხვას, იყო თუ არა შეგნებულად გაკეთებული, ვერ გეტყვით, დილიდან კონფერენციაზე ვიმყოფები. ეს თუ არ იყო უბრალოდ დამთხვევა, რადგან ბევრი პოლიციელი ქალი მუშაობს კახეთში და ამის მიღმა რაიმე სექსისტური მოტივაცია იყო, ამ საკითხით პირადად დავინტერესდები", — განაცხადა მეზვრიშვილმა.

გურჯაანის რაიონულ სასამართლოს ეზოში, გაერთიანებული ოპოზიციის აქციის ფონზე, წინა ხაზში ქალი პოლიციელების კორდონი იყო, მათ უკან კი კაცი პოლიციელები იდგანან. აქციის მონაწილეებმა სასამართლოს ეზოში მდგაქ ქალ პოლიციელებს ყვავილები მიართვეს. ქალთა უფლებების დამცველებსი თქმით, შსს-ს სექსისტური მოტივი ამოძრავებდა. ნაციონალური მოძრაობის ლიდერმა, ზაალ უდუმაშვილმა კი სექსისტური შინაარსის განცხადება გააკეთა სიტყვით გამოსვლისას:

"შემდეგ პროცესზე რას უნდა ველოდოთ, პატარა ბავშვებს ჩააცმევენ პოლიციის ფორმებს და იმათ დააყენებენ? არ ვიცი, ალბათ, ამათ მახინჯ ფანტაზიას ზღვარი აღარ აქვს".