ქართული ოცნების აღმასრულებელი მდივანი, ირაკლი კობახიძე ალეკო ელისაშვილისთვის ბოდიშის მოხდას არ აპირებს. ამის შესახებ კობახიძემ ტელეკომპანია პირველის ეთერში განაცხადა.

კობახიძის თქმით, ელისაშვილმა აქტივიზმი 2012 წლიდან, ხელისუფლების ცვლილების შემდეგ დაიწყო.

"არ ვაპირებ ალეკო ელისაშვილთან პოლემიკაში შესვლას. კიდევ ერთხელ გავიმეორებ, რომ 2012 წლამდე მე ის აქტიურობა ნამდვილად არ მახსოვს, არც ალეკო ელისაშვილის და არც თავისი თანამოაზრეების მხრიდან, რისი მომსწრეც ვართ ჩვენ 2012 წლის შემდეგ.

მაგალითად სპორტის სასახლის გარშემო, გვახსოვს ყველას რა ხდებოდა უგულავას მმართველობის პერიოდში. ვგულისხმობ იმ მშენებლობებს, რომლებიც სპორტის სასახლის გარშემო წარიმართა. სამწუხაროდ გაგრძელდა შემდეგაც გამომდინარე იმ გაცემული ნებართვებიდან, რომლებიც უხვად გაიცემოდა უგულავას მმართველობის პერიოდში. ფუნდამენტურად დამახინჯდა ქალაქის იერსახე. იგივე ტერიტორიაზე 10 ათასობით ხე გაიჩეხა. თქვენ თუ შეგიძლიათ დამისახელოთ ერთი შემთხვევა მაინც, როდესაც, ან ალეკო ელისაშვილმა, ან ნატა ფერაძემ, ან რომელიმე მათმა თანამოაზრემ გააპროტესტა ასეთი რამ, მაშინ მე შემიძლია ხელები ავწიო, მაგრამ ასეთი რამ რეალურად არ მომხდარა."

ალეკო ელისაშვილმა დღეს, პირად ფეისბუკ გვერდზე გამოაქვეყნა განცხადება, რომელშიც ირაკლი კობახიძისგან ბოდიშის მოხდას მოითხოვს.

ალეკო ელისაშვილი ნაციონალური მოძრაობის მმართველობის პერიოდში ტფილისის ჰამქრის სახელით აქტიურად მართავდა საპროტესტო აქციებს თბილისში მიმდინარე ისეთი პროექტების წინააღმდეგ, რაც მისი აზრით, აზიანებდა ქალაქს. მათ შორის იყო ყოფილი იმელის შენობის ინვესტორისთვის გადაცემა, გუდიაშვილის სკვერის რეაბილიტაციის პროექტი და ა.შ.